Ka jaka ban buh ïaka khyrdop Entry Exit Point ha Malidor ka shongdor T. 3 Klur dang iakren pynbeit u DC EJH: KSU

KHLIEHRIAT: Ka Khasi Students Union Jaiñtia Hills District Unit (KSU-JHDU) ka la leit ban ia kynduh ia u Deputy Commissioner ka East Jaiñtia Hills District ban ioh shuh shuh ki jingpynshai ha kaba iadei ba kane ka khyrdop talasi mynder ( Entry and Exit Point) ha Malidor, East Jaintia Hills District haka sngi Thohdieng.

Ha kane ka jing leit iakynduh ki dkhot ka seng ia u Deputy Commissioner la lam khmat da u bah Satly S Ryngkhlem,Vice President KSU-Khliehriat Circle ha ryngkat ka jingiadonlang ki nongialam ka KSU Jaintia Hills District kaba kynthup ia u Streamly S Niangti Finance Secretary bad uCherity D Suja Asst General Secretary ka KSU JHDU.

U Bah FM Dopth, Deputy commissioner East Jaiñtia Hills u la ong ba ia kane kam la dep ban leh ia ka ha kata ka rukom ba ym donkam shuh ban pynlong iaka jingpynshai paidbah ne Public Hearing.

Naka liang U DC ka East Jaintia Hills  ula pynpaw iaka jing sngew khia halor ka jing rem dor palat ka jaka kaba haduh kumba lai klur tyngka, hynrei ula ong pat ba watla katta ruh un sa pyrshang ban iakren bha iaka dor bad u trai jaka u bah Bindro Simpli khnang ba un ioh ban pynduna ka dor.

“Ka kam kala iaid beit shakhmat bad kiei kiei baroh ki la biang lut kaba sah ka long sa tang ban ia pynbeit  bha iaka dor jaka,” la ong u DC.

Naka liang ka Seng ka la pynpaw ka jing sngew kmen bad sngew nguh ruh ia u DC halor ka jingshim khia jong u halor kane kam bad ka KSU ka la khmih lynti ruh ba yn sa lah ban pynurlong noh ia kane ka khyrdop talasi mynder ha Malidor khnang ba yn lah noh ban tehlakam ia ka jing wan rung kyrthep ki mynder kiba na bar shapoh ka jylla Meghalaya.

“Ngin iai buddien iakane ka kam khnang ba ka jingshna iaka jaka rung jaka mih  ki mynder kan nym long suki than,” la ong ki nongialam kka KSU