Ka District Council kam dei ka jaka shongkai; ka dei ka jaka thaw aiñ: Rikut Parien

Syllad | The Rising MeghalayaFebruary 25, 2019

JOWAI: U Rikut N Parein u kyrtong jong ka Congress na Saphai ula ong ba da ki phew snem mynta ki MDC kiba shah jied ha u paidbah haka jaka ban shna ïa ki aiñ ki kyndon ban pynbha ïaka riti synshar, hynrei kim lap por ban shong dorbar ban iathir jngmut bad ban thaw aiñ.

Ka dorbar kaba slem eh ka jingshong dorbar ka dei ka dorbar mang tyngka bad lait na kane ka dorbar la shu pynlong tang kum ka rukom.

Une u nongialam barim ka JSU ula ther tyngeh ïa ki MDC kiba rim bad kiba mynta namar ba jingbym shimkhia jong ki ban shna ïaki aiñ ban tehsong ïaka jaidbynriew bad dei halor kane ka nongrim ba ula rai ban ieng ban mih aireng bad ïoh ïasam ïakli buit bad ban thaw ïaki aiñ ban ïada ia kane ka jaidbynriew rit paid. 

U Ma Rikut haka sngi Saitjaiñ ula pynlong ka jingïalang paidbah haka shnong Iooksi Kyanmynsar bad ula kyrpad ïa u paidbah ban ai ia u ka lad ban ïoh ban shakri salonsar ïaka thain Saphai bad ban shna ïaki aiñ ban ïada iaka khyndew ka shyiap, ka riti ka dustur bad kiwei kiwei.

Kumban shu pynkynmaw ba une u nongialam ka JSU, ula sdang ïa kam trei sengbhalang jong u na Ka Kiang Nangbah Government College Student Union bad bun bah ki ishu ula shim kiba la wanrah ka jingmyntoi ïaki samla pule. Hadien ula shimti ïaka kam nongialam ka JSU bad hannge ruh ryngkat ki nongialam kiba dang don mynta kila shim ki ishu ban pynbor ïaka sorkar ban wanrah ka Blood Bank, MPSC Cell, MBOSE Cell bad kiwei kiwei kiba myntoi ki samla pule.

Ula don bynta ruh ban maitphang na ka bynta ban pynbor ïaka konsil ban thaw ïaka Committee halor ban wanrah iaki dak thoh Pnar, kaba dang iais shait ka jingdawa mynta.