Jurip u Lahkmen iaka jingtei residential school ha Umladkhur

Syllad | The Rising MeghalayaSeptember 21, 2024

U MLA ka Amlarem Bah Lahkmen Rymbui haka 20 tarik Nailur ula leit jngoh iaka jingtrei iaka Eklavya Model Residential School (EMRS) kaba don haka shnong Umladkhur kaba hap hapoh ka Amlarem Sub Division, West Jaintia Hills District kaba ka jingpyntrei mynta ka la iaid shait shait.

Ïaka jingtei jong kane ka skul la bei pisa da ka National Education Society for Tribal Students (NESTS), Ministry of Tribal Affairs jong ka Sorkar India haka dor 45 klur tyngka bad ba la pyntrei da Company WAPCOS Ltd, New Delhi.

Hadien ka jingjurip haba kren shaki lad pathai khubor, u Bah Lahkmen ula iathuh ba iaka jingtei jong kane ka skul la buh mawnongrim haka 9 tarik Kyllalyngkot 2023.

Ha kaba iadei bad ka jingtrei, ula iathuh kumba long mynta iaka jingtei la dep ban pynieng 5 tylli ki building kynthup ka building jong ka iingskul, ka jaka sah na ka bynta ki shynrang bad kynthei (na ka bynta 240 ngut ki khynnnah), ka building Administrative, ka jaka sah jong ki nongtrei bad ki jingtei kiba dangsah ban pynieng ki long ka building Warden bad Principal Quarter kumjuh ki madan ialehkai bad kiwei kiwei ki jingtei.

Ula iathuh ba iaka jingtei la mang ban pyndep hapoh u bnai Nohprah (December) 2025, hynrei na ki daw jong ka jingjur slap haki saw bnai ba la dep, ka lah ban shim por khyndiat bnai ban pyndep katkum ka jingmang, hynrei wat la katta u khmih lynti pat ba hapoh shisnem tam yn lah ban pyndep pura iaka jingtei.

“Kum u nongmihkhmat nga buh ia kane ka kam kum kawei na kaba kongsan tam namar kan tei iaka lawei jong ki khynnah pule jong ka thain”, la ong u Bah Rymbui bad bynrap ba u don ka jingthrang ba kane ka Eklavya Model Residential School kaba don ha Umladkhur kandei kawei na ki EMRS kaba nyngkong tam ban plie paidbah napdeng ki 38 tylli ki skul ERMS hapoh ka jylla.

U Bah Lahkmen ula aikhublei iaka Dorbar shnong Umladkhur kaba la synniang 15 akar ka jaka na ka bynta ban tei ia kane ka skul kaba long ka jingmyntoi iaka thain Amlarem Block baroh kawei.

Ha kaba iadei bad ka jingtei iaki EMRS hapoh ka Jylla, u Bah Rymbui ula iathuh ba ha u snem 2018-2023 la sanction kumba 38 tylli ki Ekalavya Model Residential School halor ka thong ban kyntiew ia ka pule puthi hapdeng ki Scheduled Tribe bad ban wanrah iaki ha kajuh ka kyrdan bad kiwei pat ki jaitbynriew.

Nalor kata ula ong ba ha kane ka skul la mang naduh Class 6 haduh Class XII bad na ka bynta bynta ki klas XI bad XII, ki don lai tylli ki bynta, ka Arts stream, Science bad Commerce.