Jurip ka KSU Thadlaskein ia ka ITI Khliehtyrshi

Syllad | The Rising MeghalayaOctober 30, 2020

Ka Khasi Students’ Union (KSU) Thadlaskein Unit haka sngi Thohdieng hapoh ka jingialam Conard R Sana president, Sendmisaoo Phawa, general secretary haka jingiadonlang assistant finance secretary ka KSU Jaintia Hills District Unit u Shaniahshkem Dkhar bad kiwei kiwei kila hiar jurip sha ka jaka ai jinghikai iaki khynnah ban ieng hala ki jong ki kjat, ka Industrial Training Institute (ITI) Khliehtyrshi  hadien ka jingud jingnam jong ki khynnah jong kane ka jaka hikai halor ka jingbymbiang ki tiar ki tar ban leh practical.

Ha kane ka jingjurip ka KSU kala ioh ruh ka lad ban iakren bad u vice principal jong kane ka Institute bad ban pan jingshai na kaei ka daw ba biang ki tiar ki tar ban shah hikai ki khynnah ha kane ka jaka hikai.

U vice principal ula iathuh ba kadon sa kawei ka course ka bym pat biang ki tiar ban pyndonkam haba ai jinghikai bad ula iathuh ruh ba ka daw jong ka jingslem ban ioh kita ki tiar ka dei namar kane ka khlam ha kaba ki briew kiba dei ban wanrah ia kitei ki tiar ki hap ban leh quarantine ha man la ki jylla haduh ban da poi jaka. 

La iathuh ba kan shim por haduh 2 bnai eiei ban pynbeit bad ruh ban pynbiang ia ki jingdonkam hapoh kane ka Institute.

Ka KSU kala kyrpad ruh ia ki bor ba dei peit ba kin shna noh iaka surok ban rung sha ka ITI khnang ba kan pynsuk iaki ba leit ba wan sha kane ka jaka ai jinghikai.

“Ka ITI kadei kawei na ki shlem ai jinghikai kaba la wanrah jingmyntoi bad iarap shibun eh iaki samla jong ka thaiñ bad ka District hi baroh kawei ba kin ieng hala ki jong ki kjat hadien bala pyndep iaka jingshah hikai, ka sorkar ka dei ban pynthikna ban pynbiang kloi iaki jingdonkam baroh hakatei ka jaka ai jinghikai” la ong publicity secretary ka Thadlaskein u Sainborlang Suchiang.