Jop ka Young Lad’s da 14 run iaka Khliehtyrshi haka District Cricket League ka WJHDCA

Syllad | The Rising MeghalayaApril 20, 2025

Ka Young Lad’s CC ka la lah ban pynliem ïa ka Khliehtyrshi SC da 14 run (lyngba ka DLS) ha ka jingïalehkai District Cricket League kaba pyniaid da ka West Jaintia Hills District Cricket Association (WJHDCA) kaba la long ha madan ialehkai ka shnong Khliehtyrshi.

Ka Young Lad’s kaba liem iaka toss kala tied nyngkong kala buh iaka thong kaba 135/8 na ki 26.1 over. U Heiyomiki Ryngkhlem u la kylla long u namtam ha kaba marwei ula synniang 37 run na ki 42 ball kaba la biang pura ia u ban khur iaka nam man of the match.

Kiwei pat kiba la synniang sha ka jingkamai run ka Young Lad’s ki kynthup ia u Dathrangki Pariat (17), u Mewada Shylla (15), bad u Eshan Siangshai (16).

Katba u Demi Dkhar bad u K Dhar kila khur mar 3 wiket bad mar shi wicket u Arman Dkhar bad u H Timi Ryngkhlem.

Haba poi ka pali jong ka Khliehtyrshi ban beh iaka thong, u slap ula wan ban pynthud bad la pynduna iaka over sha ka 13 bad ka thong 69. Ka Khliehtyrshi SC kala shem jingeh ban beh iaka thong hadien ba ki nongtied jong ka kila khyllem uwei hadien u wei ban pynkut iaka jingiakhun da 54/6.

U Yutang Kma (18) bad K Dhar (14) ki dei ki ar ngut kiba la kamai ar dak jingkhein, kiwei pat kim shym la ban ialehkai bha.

Katba ki nongkwang ball ka Young Lad’s kiba paw ha kane ka jingiakhun ki dei u Eshan Siangshai uba la khyrwit 2 wicket ai 7 run na ki 2 over. U Waibhami Ryngkhlem bad u Namewanki Pakyntein kila khur mar shi wicket.

Ka jingialehkai haka 21 tarik Iaiong kan long hapdeng ka Phramer CC pyrshah iaka Moodymmai SC haka por 9 baje mynstep.