Jop ka YC Pdengkarong 2-1 iaka Skhentalang rah syndon ia ka nam lahduh ka Super Division ka ASSA

Syllad | The Rising MeghalayaDecember 8, 2022

Ka Youth Club Pdengkarong ka la ïoh rah ïaka nam lahduh hadien ba ka la pynliem ïaka Man-i bha Skhentalang da 2-1 kol haka jingïakhun phainal jong ka lympung ïalehkai Super Division jong ka Amlarem Sub Divisional Sports Association (ASSA) kaba long ha Ladjaplem haka sngi Palei.

U Myntri tnad kam Pohiing, Pule Puthi bad kiwei uba long ruh u MLA ka Amlarem u Ma Lahkmen Rymbui ula wan sakhi kum u kongsan, u District Sports Officer ka West Jaintia Hills District u Ma Khroobok Passah, ki dkhot nongkitkam ka ASSA bad kiwei.

Haka kynta ïakhun ka Youth Club Pdengkarong ka la ïoh ban pynkhih jar haka minit kaba 3 ba la thep da u Marshall Nongrum bad ka minit kaba 30 ba la thep da u Special Nongrum katba la Man-i Bha Skhentalang ka la ïoh ban thep kol haka minit kaba 38 da u Leo Rasmut.

U Ma Lahkmen ula sam khusnam Trophy ryngkat ka syrnod shaka kynhun lahduh katba u DSO ula sam khusnam sha ka kynhun kaba wan ba Ar.

La sam ruh ïaki khusnam shimet sha ki rangïalehkai kynthup ka khusnam ‘Man of the match’ sha u Special Nongrum jong ka Youth Club Pdengkarong, ka nam ‘Best Goalkeeper’ la ïoh da u Sambor Tariang u rang apkol jong ka Man-I Bha Skhentalang bad ka man ‘Top Scorer’ la ïoh da u Marshall Nongrum jong ka Youth Club Pdengkarong bad u Tiplang Rasmut jong ka Amlarem SCC kiba la thep kol mar 6 tylli.