Jop ka The A Team, Thadmusem bad ka Ummulong haka football league ka TSA

Syllad | The Rising MeghalayaJanuary 13, 2025

Ka The A Team, Thadmusem bad Ummulong kila khur jingjop haka jingialehkai Thadlaskein Football League kaba pyniaid da ka Thadlaskein Sports Association (TSA) ha madan Wahiajer Stadium haka 13 tarik Kyllalyngkot.

Haba phai shaka jingialehkai ka The A Team kala pynliem da 3-0 iaka Nangroi SC. Iaki kol jong ka The A Team la thep da u Cameo Lamare (39), Ebor Bareh (54) bad Daomar Phalangki (57).

Haka jingialehkai kaba bud, ka Thadmusem jop pyrshah iaka Khlietyrshi SC da 2-0. Ia kine ki kol ka Thadmusem la thep da u Johnny Dkhar (21) bad Lamphrang Dkhar (71).

Ha kawei pat ka jingialehkai, ka Ummulong SC kala pynliem iaka Lummuriap da 2-0 bad ia kine ki kol la thep da u Edify War (16) bad Langmi Bamon (45).

Haka 14 tarik Kyllalyngkot ka jingialehkai kan long hapdeng ka Malngiang SC pyrshah iaka Nongkharai SC haka por 10.00 baje mynstep, ka Takhniang SC pyrshah iaka Morathud haka por 12.00 mynsngi bad ka Sohphoh pyrshah iaka Tympang SC haka por 2.00 baje nohphai sngi.