Jop ka Sutnga SSCC haka sngi sdang ka Super Div ka EJHDFA

Syllad | The Rising MeghalayaNovember 12, 2024

Ka Sutnga SSCC kala khur jingjop da 1-0 pyrshah iaka Chiehruphi haka sngi sdang jong ka lympung ialehkai Super Division Football Tournament-4th Kyrmen Shylla Contribution Trophy haka 11 tarik Naiwieng.

Kane ka lympung dei kaba pyniaid da ka East Jaintia Hills District Football Association *(EJHDFA) kaba long ha madan artificial turf ha Diengshynrum.

Ia kane ka shikol ka Sutnga la thep da u Raplangki Lyngdoh (48).

Haka jingialehkai kaba bud, ka jingiakhun kala kut khlem da kaba iakhaid mar 1-1 hadpeng ka Rymbai Iawpynsing SC bad Thangskai Tiger SC.

Ha kane ka jingialehkai ka Rymbai Iawpynsing kala ioh shuwa ban pynkhih iaka jar lyngba u Hesmiki Rymbai (5), katba ka Thangskai kala ioh ban pynphai lyngba u Pynthyme Rymbai (19)

U kongsan uba plie iakane ka lympung dei u Ma Grimlang Dkhar uwei na ki riew rangbah ka thain Elaka Narpuh haka jingdonlang u symbud kongsan Ma Streamly Nongjop Suchen President KSU East Jaintia Unit, ki nongialam bad dkhot nongkitkam jong ka EJHDFA ba kynthup Ma James Sutnga General Secretary EJHDFA nalor kiwei kiwei.