Jop ka Seinbhalang Shkentalang haka Super Div ka ASSA

Syllad | The Rising MeghalayaDecember 4, 2024

Ka Seinbhalang Shkentalang kala khur namjop haka Super Division, katba ka Hynriam SC bad Padu Mawsku kila khur nam jop Lower Division Football Tournament kaba pyniaid da ka Amlarem Sub Divisional Sports Association (ASSA) kaba long ha madan Ladjaplem haka 4 tarik Nohprah.

Ka namjop ka Seinbhalang Shkentalang kala wan pyrshah iaka Lumpyngngad da 2-1.

Ka Lumpyngngad kala tam shuwa shakhmat lyngba ka kol kaba la thep u Benjamin Pohshna (6), hynrei tang hadien saw minit bala iaid ka jingiakhun ka Seinbhalang Shkentalang kala ioh ban pyniakhaid lyngba ka kol kaba la thep u Long Rongngi (10) bad kaba ar kala wan haka kylla miet lyngba u Armanki Rasmut (79) kaba long ka kol jop.

Haba phai shaka jingialehkai Lower Division, ka Hynriam SC kala pynliem da 2-1 iaka Shmiapang YC. Ka Shmiapang kala ioh ban thep kol lyngba Shlur Manner (21) katba iaki kol jong ka Hynriam SC la thep da u Evening Pamksang (35) bad Wannam Kassar (51).

Haka jingialehkai kaba bud, hapdeng ka Amsohrhong VTD pyrshah iaka Jaraload SC kala kut noh da ka jingiakhaid khlem da lah ban pynkhih iaka jar kol.

Ha kawei pat ka jingialehkai ka Padu Mawsku kala jop pyrshah iaka War Jaintia Veteran da 1-0 lyngba ka kol ba la thep da u Kitbok Langshiang (59).