Jop ka Khimusniang iaka Lumiawmuchai haka Super Division, mynta ka sngi ka final 2nd Div ka WJDSA

Syllad | The Rising MeghalayaAugust 20, 2022

Ka Khimusniang kala jop da 2-1 pyrshah iaka Lumiawmuchai Shangpung haka jingiakhun Super Division Football Tournament- U Kiang Nangbah Memorial Trophy kaba pyniaid da ka West Jaintia District Sports Association (WJDSA).

Haba phai sha ka jingiakhun hadpeng kine ki ar liang mamla haka sngi Thohdieng, ka Khimusniang kala tam shakhmat da shikol tang hapoh 15 minit kaba la iaid ka jingiakhun lyngba ka kol kaba la thep da u Balajied Sympli.

Kane ka kol kala neh haduh shuwa ban wai ka kyllastep ha kaba Lumiawmuchai kala ioh ban tang kylla iaka jingiakhun sha kaba iakhaid lyngba ka kol u Marco Tang (45+2).

Haba la bteng biang iaka jingiakhun haka kylla miet kala jingiakhun kala nang shongshit bad iathain ha kaba kine ki kynhun arliang mamla kila ia nion markylliang ban ioh thep kol.

Dei tad haduh 73 minit la mih paw ka kol kaba ar ka Khimusniang kaba la thep da u Precious Tang (73) bad kane ka kol kala neh haduh ba kut kaba la biang pura iaka Khimusniang ban khur lai poiñ.

Mynta ka sngi ka jingiakhun final 2nd Division- 5th Debo Shullai Memorial Trophy kan long hadpeng ka Khliehiongriang pyrshah iaka Mookyndur haka por 1 Pm ha Kiang Nangbah Stadium.

U kongsan ban wan sakhi u dei u Sanbor Shullai, Minister Arts and Culture Govt of Meghalaya.