Jop ka Khimusniang haka 1st Div ka WJDSA

Syllad | The Rising MeghalayaOctober 23, 2024

Ka Khimusniang SC kala khur iaka jingjop da 4-2 pyrshah iaka Nangbah Iawmusiang haka jingialehkai 1st Division Football Tournament kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka 23 tarik u Risaw.

Ha kane ka jingialehkai ka Khimusniang kala lah ban tam shakhmat lyngba ka kol u Deepson Tokbi (15) bad u Sooki Lamare (33), hynrei shuwa ban wai ka kylla step ka Nangbah Iawmusiang kala ioh ban thep shikol lyngba u Meker Pyrtuh (45+3).

Haba bteng iaka jingialehkai haka kylla miet ka Khimusniang kala sdang ban banbor iaka Nangbah Iawmusiang bad kala iohlad biang ban pynkhih iaka jar lyngba Deepson (57), hynrei ka Nangbah Iawmusiang kala ioh ban pynphai tang hadien saw minit lyngba u Wallam Jingsuk Suting (61).

Hadien kane ka Khimusniang kala bteng ban tynjuh iaka Nangbah Iawmusiang bad sei iaki buit ki bor haduh ban da ioh biang ban sa shikol lyngba u Deepson (80) kaba dei artad ka hattrick bad kaba la kylla long syndon ka kol jop.

Haka 24 tarik Risaw ka jingialehkai kan long hapdeng ka Sabahmuswang bad Dulong haka por 2.00 baje nohphai sngi.