Jop ka Dhana; iakhaid ka Sutnga vs Khliehriat West haka Super Div ka EJHDFA

Syllad | The Rising MeghalayaNovember 25, 2024

Ka Dhana CSC kala bteng ban khur nam jop haka jingialehkai Super Division Football Tournament kaba pyniaid da ka East Jaintia Hills District Football Association (EJHDFA) ha madan artificial turf ka EJDSA ha Diengshynrum haka 25 tarik Naiwieng.

Ka Dhana CSC kala pynliem iaka Rymbai Iawpynsing SC da 2-1. Iaki kol jong ka Dhana la thep da u Nidapynio Dkhar (31) bad Phon Khaii (90), katba iaka kol jong ka Rymbai Iawpynsing la thep da u Sumar Bareh (52).

Shwa kane, ka jingiakhun hapdeng ka Sutnga SSCC bad Khliehriat West YWSC kala kut da kaba iakhaid kaba mar 2-2. Iaki kol jong ka Khliehriat West YWSC la thep da u Moneshwar Mohela (12, 45+1). Na kaliang ka Sutnga SSCC la thep da u Neesta Feeco Bamon (90+2) bad Deligent Pdang (90+3).

Haka 26 tarik Naiwieng, ka jingialehkai kan long hapdeng ka Ladrymbai B SC vs Chiehruphi SYWSC haka por 11.45 baje mynstep, ka Rymbai Shkenshynriah vs Thangskai Tiger haka por 2.15 baje nohphai sngi.