Jop bun kol ka Mooknor, iakhaid ka Mynthong bad Mookyndur haka 1st Div ka WJDSA

Syllad | The Rising MeghalayaOctober 15, 2024

Ka Mooknor Thadmuthlong kala jop da 7-1 iaka Khliehiongriang, katba ka Mynthong kala iakhaid da 2-2 pyrshah iaka Mookyndur haka jingialehkai 1st Division Football Tournament- 12th Chatister Kharkongor Memorial Trophy kaba pyniaid da ka West Jaintia District Sports Association (WJDSA) kaba long ha Kiang Nangbah Stadium haka 14 tarik Risaw.

Ha lyndet ka namjop ba bun kol ka Mooknor kala wan lyngba ki kol kiba la thep u Iohi Dhar lai kol marwei kaba dei artad ka hattrick kab nyngkong jong kane ka aiom ialehkai. Ia kine ki kol u Iohi ula thep haka minit kaba 11, 79, 87. U Manhok Suchiang ar kol (61, 75), u Rimiki Suchiang (56), bad u Lad Tang (66). Shikol ka Khliehiongriang la thep da u Basuklang Khonglah (19).

Haba phai sha ka jingialehkai ka Mynthong pyrshah iaka Mookyndur ka jingiakhun kalong kaba iathain bad kaba iadei bor ha kaba ka Mookyndur kala iohshuwa ban pynkhih iaka jar lyngba u Damehi Phawa (2). Kane ka kol kala pynkyndit iaka Mynthong bad kala iakhun tyngeh ban ioh pynphai bad haka minit kaba 31 kala ioh ban pyniakhaid lyngba u Waladmi Shadap. Kumta ka kylla step kala kut da kaba iakhaid.

Haba la wan ban bteng iaka kylla miet, baroh ar liang kila ialehkai da ka sur kaba itynnad bad iakhun ban ioh thep kol, hynrei tad haduh shuwa ban kut ka por kine ki ar liang kila ioh pynkhih jar. Ka Mynthong kala thep iaka kol kaba ar jong ka lyngba u Riketto Dkhar (87) bad tang hadien lai minit ka Mookyndur kala lah ha kaban pyniakhaid biang lyngba u Bandaplang Pariat (90).

Haka 15 tarik Risaw ka jingialehkai kan long hapdeng ka Moosalyngkat pyrshah iaka Mukhla Evergreen haka por 12.00 baje mynsngi. Ka Chutwakhu pyrshah iaka Dulong haka por 2.30 baje nohphai sngi.