Jop bun kol ka Lumshnong, khyrwit hattrick u Skhemborlang haka 3rd Div ka EJHDFA

Syllad | The Rising MeghalayaSeptember 17, 2024

U Skhemborlang Rupai ula kylla long u namtam hadien ba ula khyrwit iaka hattrick kaba la pynlong iaka Lumshnong YWSC ban jop bun kol da 6-0 pyrshah iaka Shiborlang Pynthorsale FT haka jingialehkai 3rd Division Football Tournament kaba pyniaid da ka East Jaintia Hills District Football Association (EJHDFA) kaba long ha madan phlang plastik ha Diengshynrum haka 17 tarik Nailur.

Kine ki lai kol u Skhemborlang kila wan haka minit kaba 13, 39, 45, bynraplang ar kol da u Justin Niang 34, 68 bad u Evening Pohshna 37.

Shwa kane ka Moolang SC kala pynliem da 1-0 iaka Iongkaluh Wahsder. Ia kane ka kol la thep da u Lambres Dkhar 38.

Katba ka jingiakhun hadpeng ka Suchen Lumiarain SC pyrshah iaka Musniang Rim SC kala kut da kaba iakhaid mar 1-1.

Iaka kol jong ka Musniang Rim la thep da u Paitlang Siangshai haka minit kaba 18 bad na kaliang jong ka Suchen Lumiarain la thep da u Bestfull Suchen haka minit kaba 39.