Ïoh pyllait ki pulit 9 ngut ki khynnah ba shah khaïi ha ki kam awria ha kylleng ki jaka ha Jaintia Hils, shah kem 8 ngut

Syllad | The Rising MeghalayaJune 4, 2019

JOWAI: Ki Pulit ka jong ka Jowai Police Station, West Jaiñtia Hills kila ïoh ban pyllait 9 ngut ki khynnah kynthei kiba la ngat ha ki kam awria bad la ïohkem ïa 8 ngut kynthup ïaki kynthei ba suba nongkhaïi ïa kine ki khynnah bad ki rang kiba kwah ban pynsngewbha ïalade  na ka shnong Mihmyntdu, ka shnong kaba don hajan ka Jowai.

Kine ki khynnah kiba la ïoh pyllait ki Pulit naka kam awria ki dei kiba don haka rta kaba 14, 15 bad 16 snem ka rta. Haka sngi nyngkong la ioh ban pyllait 5 ngut na Mihmyntdu bad hynne ka sngi ba la ar la ioh pyllai 4 ngut na ki jaka bapher bapher.

Kine ki ba shah kem 8 ngut ki kynthup ïa ki suba nongpynioh kynthei (pimps) bad ki suba nongwad (client) ban leh ki kam awria ki kynthup ïaka Dapynbiang Sten (26) na Kyrwen, Riwandakaru Dann (22), Ladthadlaboh, Kristina Lyngdoh (18), Sohkynphor, Sanwaki Dkhar (28), Khliehiongriang, u Lemi Ryngkhlem (20), Demthring, u Elison Dkhar (24), Demthring, Emryngkatmitre Dkhar 20, Demthring bad u Prosperity Talang (22), Demthring.

U Superintendent of Police West Jaiñtia Hills District u Bah Lakador Syiem ula ïathuh baka jingtrei shitom ki Pulit Kynthei hapoh ka jingïalam ka Officer Incharge ka SI I Kharpran bad ka Special Juvenile Unit, ka Child Line, ka Child Welfare Committee, District Social Welfare Officer, ANTF kila ïoh ban pyllait ïa kine ki khynnah naka jingshah khaii ban leh kam awria.

U Bah Lakador ula ong kane ka kam kala paw pyrthei, kala jia hadien ba jahrngai kawei ka khynnah naduh 25 u Jymmang na kawei ka Shnong kaba don ha Jowai. Kila ioh jingtip halor ka jingjah kane ka khynnah haka 2 tarik une u bnai bad haka jingtohkit jong ki Pulit la lap ksai ba kane ka khynnah ka ithuh ïaki arngut ki kynthei naka Sohkymphor bad ka Nongjngi.

Haka jingtohkit jong ngi la lap ksai bad suba ba ka don ka jingkhaii iaki khynnah bad kila thwet ïa kine ki ar ngut ki kynthei na Laskeiñ Kyrwen bad Mowtyrshiah bad la lap ïa kawei na na Kyrwen bad kawei pat na Mihmyntdu.

“Haba la ïohbat ïa kine ki kynthei kiba suba nongkhaii la pynlong ka jingkhynra ha Mihmyntdu bad la lap ba bun ngut ki khynnah ki shah pyngngat ha ki kam awria”, la ong u SP.

U Bah Syiem ula ïathuh shuh shuh ba da ka jingiatreilang ki Pulit, ANTF, ka Child Line, ka Child Welfare Committee, District Social Welfare Officer la lap ksai shuh shuh ba kumba 15-16 ngut ki khynnah ki shah khaïi bad ngi pyrshang ban wad ki lad ki lynti ban pyllait ïaki na ki kam awria.

U SP ula ong ba ka jingtohkit kaba bin pa bin kala iaid shakhmat bad kim lah ban kheinsting halor kane ka kam ïoh don ruh ki khynnah kiba shah khaii shabar ka District bad ka Jylla. U la ong ba la rah ïakine ki 8 ngut sha ïing bishar ban tian bishar bad la pyngngat ïaki haka kyndon ain rahbor, lehbeijot iaki khynnah ba kiwei kiwei ki kyndon aiñ ba hap haka IPC.