Ioh pyllait ki lai ngut iaka Tyrpud, ka mrad kaba kyrpang na kawei ka shnong ha West Jaintia Hills

Syllad | The Rising MeghalayaJune 25, 2021

Ka Ophis jong Ka Divisional Forest Officer, Jaintia Hills Wildlife Division, Jowai ha ka 22 tarik bnai Jylliew, 2021 kala shimti ia kawei ka mrad khlaw kaba la tip kum ka Tyrpud bad haka kten Pnar Tyrpid lane ka Large Bengal Monitor Lizard na ki lai ngut ki rangbah kiba dei ki nongshong shnong jong ka Thadbamon, West Jaintia Hills District.

Kine ki lai ngut kiba ioh pyllait ia kane ka Tyrpud ki dei u Sperbha Syntem, u Springliness Kya bad u Lambormi Myrchiang.

Ka tnad kam khlaw Wildlife Division kala iathuh ba ia kane a Tyrpud la pyllait ha ka 23 tarik bnai Jylliew, 2021 ha khlaw Narpuh Wildlife Sanctuary kaba dei ka jaka kaba iahap bad ka rukom im jong ki Tyrpud.

Katkum ka jingiathuh jong kitei ki lai ngut, ia katei ka Tyrpud ki la ioh kem na kawei ka jaka kaba long harud u surok marjan bad ka Shnong ThadIalong, West Jaintia Hills District.

Ka Tyrpud ne ka Bengal Monitor Lizard ka dei ka mrad kaba kyrpang bad ka hap ha ka kyrdan Schedule I jong ka Wild Life (Protection) Act, 1972.  

Ka jingduhjait jong kane ka jait mrad ka dei na ka daw ba don ki briew ki ba pyniap ia ka ban bam ia ka doh jong ka, don ruh kiba pyniap ban pyndonkam ia ka snieh jong ka bad ruh ban pyndonkam ia ki bynta jong ka met jong ka ha kaban shna dawai. Ka jingsiat, ka jingpyniap lane ka jingkhaii ia katei ka mrad lane ia ki bynta jong ka met jong ka bad kumjuh ruh ia kiwei pat ki jait mrad khlaw ka long kaba beain bad ia uno uno lane kano kano u/ka briew ba donkti ha kaba siat/pyniap lane khaii ia katei ka mrad lane ia ki bynta jong ka met jong ka bad kumjuh ruh ia kiwei pat ki jait mrad khlaw yn pynshitom katkum ki kyndon jong ka Wild Life (Protection) Act, 1972 da kaba shah set phatok haduh 7 snem ryngkat bad ka kuna kaba ym duna ia ka 25,000 tyngka.

Ka Ka tnad kam khlaw Wildlife Division kaba la pynpaw ba mynta kiba bun ki briew kila sdang ban sngewthuh ia ka jingdonkam ban pynneh pynsah ia ki mrad mareng, bad kane ka long ka nuksa ba kiwei ki nongshong shnong kin bud ban iada ban pynneh pynsah iaki mrad khlaw bad ki jingthaw ba im baroh.