Ioh pdiang ki nongiasaid ain da ka shithi byrngem bad kuli namar ki kam mukotduma

Syllad | The Rising MeghalayaApril 11, 2024

Ka iingbishar ka High Court of Meghalaya Bar Association ha ka 10 tarik mynta u bnai ka la pynrem jur ha kaba iadei bad ka jingshah byrngem jong ki arngut ki nongiasaid ain kiba la ioh pdiang ia ka shithi byrngem ba la thep ryngkat bad artylli ki kuli na ki briew ki bym lah ban tip satia ki dei kiei.

U President ka Association u S Chakrawarty u la ong ba ha ka jingialang kaba la shong kyrkieh hynne ka sngi Balang la iakren sani bha halor kane ka jingjia bad pynpaw ruh ka jingsngewkhia kaba jur ha kaba iadei bad kane ka jingshah byrngem jong kine ki arngut ha ki runar kiba la maham ban leh tyngeh pyrshah ia ki lada ki dang iai bteng ban mihkhmat ia ki katto katne ki briew ne clients bad iashim bynta ha ka mukotduma kaba iadon bynta lang da kine ki briew ne clients.

Na ka liang ki dkhot ka Association da kawei ka sur ki la pynpaw ba kane ka jingleh ka bym iahap ka dei ka jingpyrshang ban tuklar halor ka kam jong kine ki nongiasiad ain bad ong ruh ba kam dei satia tang ka jingmushlia ia ka hok ba la pynkupbor ha ki da ka riti synshar hynrei ka dei ruh ka jingthombor ia ka tynrai jong ka imlang sahlang kaba lah shai.

Kumta ruh da kawei ka sur ka Association ka la rai ban pynrem jur halor kane ka jingshah byrthen jong kine ki arngut ki nongiasaid ain ha ryngkat ka jingpynthikna ba ka Association kan ia don ryngkat lang barabor ha syndah jong ki ha kaba kum kane ka por.