Ioh kurup ki pulit EJH haduh 4135 bilor ka dawai jyrhoh beain na ka trok kaba kylla khongpong ha Umtyra

Syllad | The Rising MeghalayaNovember 20, 2023

Ki pulit ka East Jaintia Hills haka sngi Nyngkong ki la ioh ban kurup haduh 4135 bilor ka dawai jyrhoh (phensedyl) ba 100 ml ba la khein beain kiba la leh ia ki kynja drok codeine na kawei ka trok kit umphniang kaba la kylla khongpong ha ka lynti surok bah NH-06 ha ka shnong Umtyra naduh ka step jong ka 17 tarik mynta u bnai bad kem noh ia u briew uba donkti.

Na ka liang u Superintendent of Police ka EJHD, Khliehriat, u Jagpal Singh Dhanoa, IPS haka sngi Nyngkong ula pyntip ba ha ka 17 tarik mynta u bnai ha ka por 6:30 mynstep ki la ioh jingtip ba ka don kawei ka trok kit umphniang kaba don ia u Regn No. NL-01-AH-2246 kaba la kylla khongpong sha ranab ha ka shnong Umtyra ha kaba la shem ba u nongniah jong kane ka trok uba kyrteng u Shakeep Sheik uba dei na ka jylla Maharashtra u la sahkut hapoh ka jaka shong jong ka trok bad mynsaw jur.

Hadien la lah ban pyllait noh ia u bad pynkynriah noh mardor shapoh Civil Hospital Khliehriat na ka bynta ban aijingsumar. Ha ka jingtohkit bniah une u nongniah u la ong ba kane ka trok ka dei kaba kit diesel ha kaba la lap ruh ia ki kot ki sla na ka jaka buh jong kane ka trok. Hynrei, hadien ba la bishar bniah ia ki kot ki sla la shem ba ka kyrteng jong u trai bad ka jaka sah ka iapher na ka e-challan App.

Kumta ruh la pynlong shuh shuh ia ka jingtohkit na ka liang ka ophis jong ka Bharat Petroleum Transport ha kaba la shem ba kane ka kali kam shym la kit ia ka umphniang diesel na ka jaka jong ki bad ym don rekod ruh ha kaba iadei bad kane ka kali ha ka ophis jong ki kaba la wanrah ka jingsuba sniew.

Kumta haka sngi Nyngkong la pynlong ka jingtalasi bniah ia katei ka trok ban lap ia ki jingshisha baroh ha kaba la lapdien ia ka bynta ba la shna kyrpang da ka nar hapoh jong kane ka trok.

Ha ryngkat ka jingiadon lang da ki sakhi ba laitluid hapoh ka jaka ba jia bad da ka jingiarap jong ki nong ot nar la lah ban weng ia katei ka jingker ba kyrpang ha ki bynta ba kyndong jong ka kali ha kaba la lapdien haduh 4135 tylli ki bilor dawai jyrhoh  Phensedyl, bad ha ka jingleh tes la shem ia ka jingdon jong ka kynja drok codeine.

Halor kane na ka liang ki pulit ki la rejistar case hapoh ki kyndon ka NDPS Act hapoh Khliehriat police station.