Ioh kurup ki BSF buntylli ki masi bad ki tiar pynbhabriew ba thmu khaii tuh sha Bangladesh

Syllad | The Rising MeghalayaOctober 24, 2024

Ki shipai Border Security Force (BSF) Meghalaya sa shisien pat ki la lah ban pynpulom noh ia ki kam khaii beain lyngba ki jaka khappud da kaba ioh ban kurup noh ia buntylli ki masi bad ki tiar jingtah jingsleh pynbhabriew kiba shongdor palat T.16 lak na ki bynta khappud ka Jylla.

Ki BSF na ka 4th Battalion hadien ba ki la ioh ia ka jingtip kaba thikna ki la pynlong ka jingkhynra ha ki bynta khappud bad ioh ban kurup noh haduh 27 tylli ki masi ia kiba la buhrieh hapoh kawei ka jaka khlaw hajan khappud da ka jingthmu ban khaii tuh shapoh Bangladesh.

Hadien ia kine ki masi la aiti noh sha ki bor pulit ka Muktapur ban leh shuh shuh ia kaba donkam.

Katba ki BSF na ka 193rd Battalion ki la ioh ban bat noh ia kawei ka kali pickup No. ML-05-AC kaba kit ia shibun bah ki jingtah jingsleh pynbhabriew khlem da don satia ia ki kot ki sla kiba biang na ki bynta khappud ka East Khasi Hills.

Katba ha kawei pat ka jingkhynra ki BSF ki la ioh ruh ban kurup noh ia shibun bah ki mar bam bad kyiad na ki bynta khappud.