Ioh kurup drok ba heh duh ki pulit East Jaintia Hills ba shongdor T.15 klur

Haka jingiakhun pyrshah iaka kynhun ki nongkhaii drok ba pyniaid iew ia u drok, ki Pulit jong ka East Jaintia Hills District kila ioh kurup drok ba heh duh ba khia haduh 2.738 kilo ba shongdor T.15 klur ha ka iew ka pyrthei ne International Market haka sngi Nyngkong.
Ia une u drok heroin la ioh kurup hajan ka BMS Fuel Station Nongsning bad la ioh kem ruh ia ki ar ngut ki briew kiba na Manipur bad Nagaland. Kine ki kiba shah kem ki dei u M. Tuanbiaklian Guite, 32 snem na Churachandpur, Manipur bad u Imliakum Longkumer 40-snem na Dimapur, Nagaland.
Ki Pulit ANTF bad Pulit Ladrymbai kila ioh kurup ia u ne u drok bad ia kine ki ar ki nongkhaii drok da kaba pynap shrip ha katei ka jaka bad iohbat iaka kali Tata Winger kaba don ia u Registration No. NL 07T 0815 ba kit ia une u drok.
Haka jingkhynra iaka kali ha ki jaka bapher bapher ha kane ka kali la lap haduh 200 tylli ki synduk sabon ba la burieh ia u drok. Haka jingtest ia une u drok uba khia 2.738 kilo haka jingiadonlang ki nongsakhi ba laitluid la pynthikna ba u dei u drok heroin.
Ki Pulit kila register iaka case ha Khliehriat PS bad ka jingtohkit ka la iaid shakhmat bad ka jinthwet ia kiwei pat ki suba donkti kala iaid shakhmat.
Ki Pulit kila kurup ar tylli ki mobile, ka pisa T.2500 bad ia kane ka kali kaba ki pyndonkam ban kit ia u drok.

Leave a Reply