Ioh ka Meghalaya T.199 klur ban tei ia ki project kam jngohkai ha Umiam bad Mawkhanu

Syllad | The Rising MeghalayaNovember 30, 2024

Ka Jylla Meghalaya ka la ioh ia ka song pisa kaba kot haduh T. 199 klur na ka “Special Assistance to States for Capital Investment – Development of Iconic Tourist Centres to Global Scale” scheme 2024-25 na ka bynta ban tei ia ki jingtei kiba iadei bad ki kam jngohkai ha Umiam bad Mawkhanu.

Kane ka jingmang pisa ka dei shibynta jong ka T.3,295.76 klur ba la mang sha ki 23 tylli ki jylla jong ka ri India kiba hap hapoh ka program kaba thmu ban kyntiew ia ki jingtei ha ki kyrdan ka pyrthei bad ban kyntiew ia ka roi ka par kaba neh.

Kane ka song pisa kan kyrshan ia ki artylli ki project ki ban pynkylla dur ba la tyrwa da ka Tnad Tourism, kata ka jingshna pynbha bad pynitynnad ia ka pung Umiam bad ka jingshna ia ki jaka jngohkai ha Mawkhanu ia kiba la mang mar T.99.27 klur. Ka Meghalaya ka dei kawei napdeng ki san tylli ki jylla kiba ioh ia kane ka skhim da kaba tam ia baroh ki jylla ka thain Shatei Lammihngi bad kiwei pat ki jylla ba heh ha ka ri ki bym shym la ioh ia ka song pisa kaba palat ia ka T.100 klur lait na ka Assam.

Ka jingpynkylla dur thymmai ia ka pung Umiam: Ka Pung Umiam, ka spah ha ka kolshor bad ka mariang kaba itynnad ka Meghalaya kaba don ia ki jaka kiba itynnad ka long kaba la khreh ban long ka jaka jngohkai kaba pawkhmat.Ka project kan kynthup ruh ia ka crafts village, arts and culture pavilion, botanical garden, amphitheater bad ki jingtei kiba kongsan kum ki surok bad kiwei kiwei. Kane ka jingpynbha thymmai kan kynthup ruh halor ka jingpynrung ia ka surok bah Western Bypass kaba thmu ban pynduna ia ka jingkhapngiah ha ka nongbah Shillong bad Sohra.

Kumba ka long mynta ka pung Umiam ka khring ia haduh kumba 16,222 ngut ki nongwan jngohkai man u snem, bad mynta la khmih lynti ba ka jingdon jong ki nongwan shangkai kan kynjoh sha ka 1,27,750 ngut man la u snem hadien ba la pyndep ia kine ki project.La khmih lynti ruh ba kane ka project kan ai kam ai jam ia haduh 1,168 ngut kynthup ia 2,675 ngut ki ban ioh jingmyntoi lyngba jong ki ha kiwei pat ki rukom bad ka ban lah ban kyntiew ia ka ioh ka kot bad ka roi ka par.

Ki jingtei ia ki kam jngohkai ha Mawkhanu: Ki jingtei ba kongsan ha Mawkhanu kin kynthup ia ka Meghalayan Experience Theme Park, Festival Ground and Amphitheater nalor kiwei pat. Kane ka jaka kan long ruh ka jaka pynlong ia ki tamasa bapher bapher kum ka tamasa Cherry Blossom Festival, tamasa iaput ia tem, jinglehkmen ia ki sap ki phong bad kolshor jong ki trai ri trai muluk bad kiwei kiwei.

Ka jingshna pynwandur bad kaba lah ban kynthup lang ia baroh, ka project ha Mawkhanu ka thmu ruh ban khring ia ka jingwan jong ki nongwan jngohkai kiba wan ha Shillong, ban ai kam ai jam ia palat 1,016 ngut ki briew ha ki kam bapher bapher kynthup ia kumba 2,327 ngut ha kiwei kiwei pat ki rukom.

Na ka liang u Myntri Rangbah ka Jylla u Conrad K Sangma u la pynpaw ka jingsngew sarong halor ka jingjop jong ka jylla da kaba ong, “Kane ka jingmang pisa ka pynskhem biang ia ka jingangnud jong ka jylla ban thaw ia ki jaka jngohkai kiba ha ka kyrdan jong ka pyrthei, kiba lah ban neh bad khring ia ki nongwan shangkai pyrthei na kylleng. Kine ki project kin ym kyntiew tang ia ka ioh ka kot jong ngi, hynrei kin pynneh pynsah ruh ia ka kolshor bad ka mei mariang kaba riewspah na ka bynta ki pateng ban wan.”