Ioh ka jylla T.108 klur ban sam iaka scholarship sha ki 49 hajar ki samla pule

Syllad | The Rising MeghalayaNovember 26, 2024

Ka Sorkar Jylla kala ioh pdiang iaka song pisa kaba kot T.1,08,83,36,926 klur na ka bynta ban sam iaka scholarship sha ki palat 49 hajar ngut ki samla pule ka Jylla.

Ha u kyrwoh bala pyllait haka 25 tarik Naiwieng, la pyntip: “Ka Directorate of Higher & Technical Education kala ioh pdiang ia ka song pisa kaba kot baroh T. 1,08,83,36,926 klur na ka bynta ban pyllait ia ki scholarship, kata kaba kynthup ia T.98,08,91,9521- klur na ka Ministry of Tribal Affairs ka Sorkar India kum ka bhah na ka Sorkar Pdeng bad T.10,89,87,995 na ka Sorkar Meghalaya kum ka bhah na ka jylla.

Ka Tnad ka ka pyntip ba la dep ban pyllait ia kane scholarship na ka bynta 49,628 ngut ki samla pule ka jylla Meghalaya ha ki ar bynta, bad mynta ka dang ap ban ioh ia ka pisa na ka Sorkar Pdeng na ka bynta ka kylla kaba lai ban pyllait ia ka scholarship kaba dang sahteng sha ki 27,127 ngut ki samla pule.

Ha ka kylla kaba nyngkong, ka song pisa kaba la ioh pdiang kalong T.42,32,13,280 kaba kynthup ia ka bhah na ka sorkar pdeng kaba long T.38,08,91,952 bad ka bhah na ka sorkar jylla kaba long T. 4,23,21,328 bad la dep pyllait sha ki 17,364 ngut ki samla pule.

Kumjuh ha ka kylla kaba ar la ioh pdiang ia ka song pisa kaba T.66,66,66,667 kaba kynthup ia ka bhah na ka sorkar pdeng kaba long T.60,00,00,000 bad ka bhah na ka sorkar jylla kaba T. 6,66,66,667 ha kaba la dep ban pyllait sha ki 32,064 ngut ki samla pule.

La ong ba ka scholarship kaba dang sahteng ka long na ka bynta ki 27,127 ngut ki nongioh jingmyntoi ia kiba yn sa pyllait mar ia ioh ia ka pisa ha ka kylla kaba lai na ka Ministry of Tribal Affairs jong ka Sorkar India.

Ka Tnad ka la pynpaw ba ka la shim khia bha bad ka sorkar India na ka bynta ban pyllait noh ia ka pisa ha ka kylla kaba lai khnang ba baroh ki sam pule kiba dei hok ban ioh ia kane ka scholarship kin ioh ha ka por kaba biang.