Ïoh ka Jaiñtia Eastern College ia u soh ka jingtreishitom, yn siew tulop ka sorkar iaki nonghikai

Syllad | The Rising MeghalayaSeptember 1, 2021

Hadien 29 snem ka jingïaid lynti ka Jaiñtia Eastern College ban sam jingnang jingstad sha ki khynnah, ki samla kiba wan na ki longïing kiba duk ba suk kala ioh ban kheit ïa u soh jong ka jingtrei shitom ba naduh mynta u bnai Nailur ka sorkar jylla kan siew iaka tulop jong ki nonghikai bad ki nongtrei haduh 31 ngut hapoh ka People’s College Grant.

Ia kane la pynbna da u myntri ka tnad pule pubthi uba long ruh u MLA jong ka Amlarem Constituency ma Lahkmen Rymbui haka jingialang kaba long ha Jaintia Eastern College, Khliehriat haka sngi Balang.

Ha kane ka jingialang la iadonlang u Myntri ka tnad Social Welfare uba long u MLA Khliehriat, ma Kyrmen Shylla, MLA ka Sutnga Saipung ma Shitlang Pale, Ryntihlang Rapthap, IAS Secretary ka tnad pule puthi, u Dr. Phervision Nongtdu, principal Jaintia Eastern College.

U Ma Lahkmen Rymbui ula ong ba naduh ba sdang ka sorkar MDA ka thong hi ka dei ban pynbha iaka pule puthi ym tang ha ki jaka sor, hynrei sha baroh ki jaka kyndong jong ka Jylla ba ki briew kin don ka jingsngew longtrai ha kino kino ki kam pynroi pynpar ka sorkar.

U ma Lahkmen ula ong “Ngi la pyndep hok ïaka jubanlak kaba la khlei bad ban ngin pyrshang shuh shuh ban rung sha ki jaka kyndong tam ban wanrah iaka roi ka par kaba salonsar.”

“Ka suk iaka sorkar ban pynlut na ka bynta kano kano ka kam trei jingtei, hynrei mynta ka sorkar kan hap ban pynlut ym duna 2 klur iaka Jaintia Eastern College ban siew iaka tulop,” la ong u ma Lahkmen bad bynrap ba ka sorkar hapoh ka jingialam u Myntri Rangbah Conrad K Sangma ka don iaka thong ban wanrah iaka pule puthi kaba bha bad kaba janai bad kane ka jingiarap ka sorkar kam dei ka jingkut, hynrei ka jingsdang.

Ula banjur iaki nonghikai ban long ki nonghikai kiba treishitom bad ban pynthymmai iaka rukom sam jingnang jingstad sha ki khynnah katkum ka jingdawa ka por.

Kiwei kiwei kiba kren ki kynthup ia u MLA ka Khliehriat ma Kyrmen Shylla, ma Shitlang Pale, u Bah R Rapthap bad u Dr. Phervision Nongtdu ula iathuh iaka jingiaidlynti ka College naduh bala seng iaka 1992.