Ioh jingmyntoi haduh 366 ngut ki khynnah skul na ki ‘Soft Skills bad Wellbeing Winter Camps’ ha EJHD
Haduh 366 ngut ki khynnah skul kaba kynthup ia 108 ngut na Jalaphet Upper Primary School, 103 ngut na Tluh Upper Primary School bad 155 ngut na Narwan Upper Primary & Secondary School ki la ioh jingmyntoi na ki Soft Skills bad Wellbeing Winter Camps.
Kane ka camp ka dei halor ban kyntiew iaka sap ka phong ki khynnah bad ka jingshngain haka koit ka kaba la pynlong halor ka phang pdeng “Ia ka Mynried” lane ia ka Lawei ia kaba la bei tyngka da ki bor pyniaid District ka East Jaintia Hills lyngba ka District Mineral Foundation.
Ia ka jingleh burom bad ka jingsam syrnot sha kine ki khynnah skul la pynlong ha la ki jong ki skul, ha kaba na ka liang u Additional Deputy Commissioners u Gautam Warjri, MCS, bad ka Kong Jacqueline Una Kharpuri, MCS, ki la ia don lang kum ki Kongsan ha ka jingsam syrnot ha Jalaphet bad Tluh UPS. Katba u Dr. Riwanki Pyrtuh, Block Development Officer, Saipung C&RD Block u la ia don lang ha ka prokram ha Narwan UP bad SS.
Ha ka jingpyrshang ban pyniasoh ia ki samla trai shnong ha ki prokram kiba don jingmut ha ki por shuti, la shim ia ki sienjam ban pynlong ia kane ka ‘Winter Camps’ kaba dei ka prokram aijinghikai kaba thmu ban pynpaw ia ka jingsngewkhia jong ka sorkar halor ka jingngop jong ki khynnah kiba dang khie dang san ha ki jait jingdih kiba sniew.
Kum ka tnad kaba pyntreikam ia ka prokram, ka social enterpirse AVENUES ka jylla ka la thaw ia ki rukom aijinghikai kaba pynleit jngmut ha kaba tei ia ka jingshaniah, ka jingnang jingtip bad kongsan ha ki jingiakren bad ki rukom ialeh pyrshah kiba koit ba khiah ki ban iarap ban pyllait na ki jingdih ba sniew. Kane ka Winter Camp ka plielad ruh ia ki khynnah skul ba kin lah ban pynpaw ia la ki jong ki sap ki phong ha ka jingpyrshang ban tei ia ka jinglong ba shimet jong ki. Kine ki jinghikai ki dei kiba thmu khamtam na ka bynta ki khynnah skul kiba pule ha ki klas 7, 8, 9 bad 10.
Ki jingkdew ba kongsan ha kane ka jingsam ia ki syrnot ka long halor ka jingkular da ki nongiashim bynta ha ka prokram ban kiar na u drok bad kiwei pat ki jingdih pynbuaid. Katto katne na ki nongiashim bynta ki la kiew ruh ha ki rynsan ban pynpaw ia ki jingioh jinghikai lyngba kane ka prokram, katba kiwei pat ki la pyni ia la ki jong ki sap ki phong hapdeng ki nongwan iashim bynta.
Ha ka jingkren ha Jalaphet u Bah Gautam Warjri MCS u la iaroh ia ka sienjam jong ka kynhun kaba aijinghikai da kaba ong, “Nga dang shu iakren bad u project coordinator halor ka jingdonkam ban pynlong ia kaba kum kane ka prokram ha kiwei pat ki bynta jong ka district khnang ba ki khynnah skul na ki thain kiba kyndong ruh kin ioh jingmyntoi na kum kine ki prokram namar ngi la iohi da la ki jong ki khmat hangne ia ki jingkylla bad ia ka jingshaniah kaba phi la tei hapdeng ki khynnah.”
Kumjuh ka Kong Jacqueline Una Kharpuri, MCS ha ka jingkren ka Tluh UPS ka la ong, “Ka jingjur jong ki jingdih buaid ha ka district jong ngi ka dei ka mat iakren kaba kongsan ha ki jingialang ki jong ki. Dei na kane ka daw ba ki bor district ki la pynleit jingmut kyrpang ban pynlong ia kiba kum kine ki prokram.Na ka liang u DC ruh u don ia ka jingmut kaba skhem na ka bynta ka jingbha ka jong phi, bad ka dei ka jingkyrmen ka jong ngi lyngba kine ki prokram ba phin ioh ia ki jingshemphang bad ka jingshlur ban pynsangeh ia kine ki jingkyrni ha ki jingdih buaid bad ia ki tynrai jong ka namar phi ki samla phi long ka lawei bad ngim kwah ban iohi ba ka lawei jong phi kan shah pynjot ha kane ka jait jingpang.”
Kane ka prokram aijinghikai ka la sdang naduh u bnai Nohprah 2024 ha Khliehriat bad ka la poi sha palat 900 ngut ki khynnah skul ha kylleng ka district kat haduh kine ki sngi.Ia kane ka sienjam yn sa pyniar shuh shuh sha kiwei kiwei pat ki skul ha kine ki bnai ki ban wan da ka jingthmu ban kynjoh sha ka palat 1,700 ngut ki khynnah hapoh ka district.

Leave a Reply