Ioh jingithuh ka Bethany Hospital, Shillong na ka CAHO halor ki lad aijingsumar ba biang tam

Syllad | The Rising MeghalayaApril 7, 2024

Ka Bethany Hospital, Shillong ka la ioh pdiang ia ka jingithuh kum ka jaka aijingsumar kaba biang tam hapoh ka thain Shatei lammihngi (North East) lyngba ka Consortium of Accredited Healthcare Organisations (CAHO), India.

Katkum kane ka jingithuh, ka Bethany Hospital ka la wan ha ka kyrdan kaba nyngkong hapoh North East bad kaba 37 hapoh ka Ri baroh kawei ka ban shah jied halor ka jingkut jingmut bad ka rukom aijingsumar kaba biang tam bad kaba shngain na ka bynta ki nongpang.

Ia kane ka jingai jingithuh la pynbna ha ka sngi kut jong ka International Healthcare Conclave ba ar sngi kaba la long ha Kolkata ha kaba la ia don lang ruh u Lat ka West Bengal u Dr. C V Ananda Bose bad ka jingwan iashim bynta lang da ki riew pawkhmat ha ka liang ka koit ka khiah jong ka ri bad ka pyrthei, kata kaba kynthup ia u Kresimir Antonio Paliska, Senior Vice-President bad CEO, AACI America, Dr Joel A Roos Vice President, Joint Commission International (JCI), Manvir Victor Board Member – Global Advisory Group for World Health Organisation, Dr Shin Ushiro Executive Board Member, Japan Council for Quality Health Care (JQ), Dr M A Kadar Marikar Former CEO, Malaysian Society for Quality in Healthcare, Abraham Fenn Chairman & President, New Zealand Organisation for Quality (NZOQ); President, Asia Pacific Quality Organization (APQO), John Yoon, Managing Director, Asia Pacific, JCI, Dr Atul Mohan Kochhar Chief Executive Officer, National Accreditation Board for Hospitals & Healthcare Providers (NABH), Padma Shri Dr Mammen Chandy, Padma Shri Dr Harsh Mahajan, Dr Alexander Thomas nalor kiwei pat ki riew shemphang na ki kynhun ki tnat ka koit ka khiah kiba pawkhmat.

Kum ka hospital kaba la kiew shaphrang ha ka rukom aijingsumar kaba bha tam, ka Bethany Hospital ka la iaid shakhmat ban pyntreikam ia ki sienjam kiba iadei katkum ka standard ba la buh da ka National Accreditation Board for Hospitals & Healthcare Providers (NABH) bad ka National Accreditation Body for Testing and Calibration Laboratories (NABL) hapoh ka thain. Kane ka jingithuh ka pynpaw ruh halor ka jingtrei shitom bad ka jingkut jingmut jong kane ka hospital ban kyntiew bad pynbha ha ka liang ki lad aijingsumar kumjuh na ka bynta ka jingshngain jong ki nongpang.

U Dr. Kyntiewlang Sanmiet, Quality Manager bad nongaiktien ka Bethany Hospital, uba la pynpaw ia ka jingkmen halor kane ka jingioh pdiang ia kane ka jingithuh u la ong, “Ka long ka burom kaba khraw na ka bynta ka Bethany Hospital ba kan ioh pdiang ia kane ka jingithuh na ka CAHO kum ka jaka sumar kaba bha tam.Kane ka jingioh jingithuh  ka pynpaw ruh halor ka jingkut jingmut kaba khlem sangeh ka jong ngi na ka bynta ban kyntiew shuh shuh ia ka lad aijingsumar bad kaba la pynlong ia kiba bun ki nongpang kiba wan shah sumar ba kin ioh ia ka jingkoit jingkhiah kaba pura.”

Kane ka jingioh jingithuh hapoh ka CAHOCON, ba la wan iashim bynta da ki riew pawkhmat ka pyrthei ha ka liang ka koit ka khiah ka pynapw ia ka jinglamkhmat ka jong ka bad ia ka jingkut jingmut ban kyntiew ia ka standard ha ka liang ki lad jingsumar bad na ka bynta ka jingshngain.