Ioh jinghikai rep Krai ki nongrep lyngba ka DSRE ha ICAR Umiam

Syllad | The Rising MeghalayaOctober 20, 2023

Ia ka prokram aijinghikai kaba lai sngi kynthih kaba iadei bad ka jingai jinghikai halor ka rukom rep Krai ne Millets lyngba ka juk jingstad la pynlong naduh ka 16 haduh ka 18 tarik mynta u bnai da ka Division of System Research and Engineering (DSRE) hapoh ICAR Research Complex for NEH Region ha Umiam, Ri Bhoi District.

Ha kane ka prokram kaba  long ruh kum shibynta jong ka Tribal Sub Plan (TSP) la wan iashim bynta da ki 25 ngut ki nongrep na ki shnong bapher bapher ka Ri Bhoi District bad Jaintia Hills, kata kaba kynthup na ka shnong Thadnongiaw, Umeit, Mawbri, Khliehumtrew bad Khanduli.

Ia kane ka prokram aijinghikai la plie da ka Dr. S. Hazarika, Head ka division bad nodal officer jong ka TSP kaba la pynpaw ruh halor ka jingkongsan jong ka rep Krai hapdeng ki kynhun nongshong shnong riewlum ka jylla Meghalaya.

Ha kane ka prokram ka la don ruh ka jingpyni nuksa da ki saiantis jong ka division kiba kynthup ia u Dr. B. Makdoh, Dr. Krishnappa R, Dr. Debashish Chakraborty, Dr. Letngam Touthang bad ka Prabha Moirangthem kiba la batai bniah ruh halor ki sienjam ban kyntiew ia ka jingpynmih Krai ha ka jylla Meghalaya, kata da kaba kdew kyrpang halor ki sienjam kiba katkum ka juk jingstad teknoloji bad pynshlur ruh ia ki nongrep ba kin nangpynkhlain shuh shuh ia ka jingrep bad ka jingpynmih ia u Krai u ba bha.

Kine ki jait mar rep  ki dei kiba lah ban shan bad mih wat ha ki jaka kiba shah ktah na ka jinglong jingman jong ka suinbneng bad ka mariang, kata khamtam ha ka por tyrkhong ne ka por tlang.Nalor kata ki riew shemphang ki la aijingtip ruh ha kaba iadei bad ka rukom rep kaba kynthup lyngba ka jingpyrshang kaba khlem pyndonkam dawai ne organic practice nalor kiwei pat ki bynta.

Nalor kane kane ka prokram ka aijinghikai ruh halor ki lad sengkam sengjam lyngba ki kor ki bor jingstad ki ban lah ban pynkylla ia u Krai sha kiwei pat ruh ki jait mar bam.

Shuh shuh ia kaba kum kane ka prokram la pynlong ruh ryngkat ka jingiatreilang bad ka KVK Jaintia Hills hapoh Khanduli, Jaintia Hills ban iamir jingmut halor ka jingpynkhlain ia ka jingpynmih ia une u mar rep (Krai) bad halor ki jingmyntoi kiba lah ban ioh hadien habud.

Shi bynta jong kane ka prokram la sam ruh ia u symbai Krai uba mar 4 kilo, dawai khniang organic 3 litar, ki symbai jhur kum u shyieng motor, 20 kilo, phrisbin 10 kilo, salad 4 kilo, kubi 100 gm, phul 80 gm bad brocolli 80 gm sha ki nongrep.