Ioh bat nong Bangladesh ka KSU, ki wan na Jammu and Kashmir

Syllad | The Rising MeghalayaDecember 19, 2021

Ki nongialam bad ki dkhot ka KSU Moodymmai, Wahiajer bad ka Jowai Unit kila ioh bat 7 ngut ki suba nong Bangladesh haka miet 17 tarik une u bnai.

U Nidapoi Shadap, publicity secretary KSU Jowai unit ula iathuh ba ia kine ki bar jylla la ap iaki na Ummulong, hynrei namar ba dei da ka kali ka KSU kala pyntip mar mar sha ki pulit ka Phramer Traffic Cell kiba la bat pat ia kine ki bar ri.

Ka khubor ka iathuh ba kine ki bar ri kila wan poi na Jammu and Kashmir bad ym pat lah pynthikna ia ka jaka kaba ki thmu ban leit.

Ka KSU halor kane ka jingbat ia kine ki suba nong Bangladesh kala mudui da ka jingujor ejahar ha Phramer Traffic Cell, khnang ba ki pulit kin ioh ban leh katkum ka jingdonkam jong ka aiñ.

Halor kane ka jingioh bat ia kine ki suba bar ri, ka jingtohkit ki pulit kala iaid shakhmat.

Kine ki suba nong Baladesh ki don haduh 7 ngut kynthup iaka longkmie bad 2 ngut ki khynnah bad 4 ngut ki shynrang.

Ka KSU kala kyntu iaka tnad Infiltration ban teh lakam ia kane ka jingrung beaiñ ki briew bar ri bad kala ong ruh ba kam nym ailad ia kane ka jingwan rung kyrthep ki briew kiba nabar sha kane ka thain.