Ioh bat ki VDP ka Mookympad iaki phew ngut ki bar jylla na Bongaigaon Assam ba thmu ban trei ha ki Coke Factory ha Elaka Sutnga

Syllad | The Rising MeghalayaAugust 5, 2021

Ka VDP jong ka shnong Mookympad ka la ioh bat ia ki 43 ngut ki bar jylla ki ba la wan kit da ka wei ka truck ba don ia u no AS 25EC 3955 haka sngi pale haka por 7 baje mynsetp.

Ka VDP shnong Mookympad haba tohkit bniah kia kine ki bar jylla kila iathuh ba ki la thmu ban leit trei sha sha ka kharkhana coke ka ba kyrteng S.K Coke ka ba don ha Nongjri, Elaka Sutnga.

la iathuh ruh ba ia kane ka Coke ka dei ka ba long trai da u Ma Forgive Dkhar na ka shnong Sutnga.

Ka VDP kala kynthoh ia ma Forgive Dkhar halor ka jingpynmih khubor jong u ba kyndit ia ka jingiaid rally ki khun ka ka Elaka ha ka 03/08/2021 ban pyrshah ia ki coke da ka kynnoh ba ki pynkhein ia ki kyndon SOPs COVID-19, hynrei tang shi sngi hadien u ma Forgive Dkhar u wanrah syndon shi truck da ki briew ki na bar jylla na Bongaigaon Assam khlem don ia ki kot ki sla ki ba biang.

U president VDP Mookympad ma Wa-oo Supooh ula pynrem iaka jingkynthoh u ma Forgive Dkhar ba u ong ba ki khun ka Elaka Sutnga kim ioh jingbit na DC ha shuwa ban pynlong ia kane ka rally bad buh jingkylli kylla ia u ma Forgive ula ioh jingbit ne permission ban wan rah ia kine ki briew na bar jylla na ki office lane ki tnad ba dei peit.

Ka VDP ka pyrshah jur iaka jingwanrah ia ki bar jylla sha ki kharkhana coke beaiñ.

Haka juh ka por kane ka coke kharkhana SK Coke ka dei ka bym pat don kot don sla wat tang ia ka CTE hynrei ka la sdang ban thang na duh kine ki bnai ba la dep, la kynnoh u ma Supooh.

Shuh shuh ha ka 02/08/2021 ka VDP Moolympad ka la ioh ruh ban bat ia ka wei ka bus traveller ka la kit ia ki phew ngut ki bar jylla ki ba la thmu ban leit trei sha ki kine ki kharkhana.

Ka VDP kala maham jur ia ki trai coke factory ba kim dei ban wan rah ia ki bar jylla ki bym biang ia ki kot ki sla. Khamtam ha kum kine ki por ba dang don u ne u khniang Covid-19. Lada ka VDP ka ka dang lap ia kum ki me ki kam beain ka VDP kam banse ban leh da ka ba tyngeh.