Ioh bat ka KSU haduh 24 ngut ki suba nong Bangladesh na khappud South West Khasi Hills

Syllad | The Rising MeghalayaAugust 14, 2024

Ka Khasi Students’ Union (KSU) Ranikor Circle haka 14 tarik Nailar ka la ioh ban bat noh haduh 24 ngut ki suba khar Bangladesh na ki bynta khappud ka India-Bangladesh ha South West Khasi Hills District.

Namar ka jingsuba jur ba ki dei kiba wan napoh Bangladesh hadien ba kim shym la lah ban pyni ia ki kit ki sla kiba biang, kumta na ka liang ka KSU mardor ka la leit ban aiti noh ia ki sha ki bor pulit ban leh ia kaba donkam.

Ka KSU lyngba u kyrwoh ka kyntu jur ia ki shipai Border Security Force (BSF) kumjuh ia ka tnat pulit bad ki bor pyniaid District ka South West Khasi Hills ba kin shim ia ki sienjam kiba kongsan khnang ban lah ban khanglad ia ka jingwan rung jong ki briew napoh Bangladesh sha kane ka jylla namar ka jinglong jingman na ki kam sain hima sima hapoh Bangladesh.

“Ngi maham jur ruh ia ki kontraktor bad ki nongai kam ai jam ba kin kiar na kaba pyndonkam da ki nong Bangladesh,” ong ka KSU.

Shuh shuh ka KSU ka maham ruh da kaba tyngeh lada ki shipai BSF bad ki bor sorkar ki pulom ban shim ia ki sienjam kiba donkam ban pyrkhing na ka jingwan rung jong ki nong Bangladesh shapoh kane ka Jylla.