Iatreilang ka MSPCB bad Hulladek ban tehlakam ia ki jingeh kiba mih lyngba ki e-waste

Syllad | The Rising MeghalayaMay 22, 2024

Ka Hulladek Recycling Pvt Ltd, kaba dei ka kompeni ba pawkhmat ka India ha ka liang ka waste management ha ryngkat ka jingiatreilang bad ka Meghalaya Pollution Control Board (MPCB) ha ka 21 tarik Jymmang ki la lah ban pynlong ia ka E-waste Management Summit 2024 kaba seisoh ha kane ka nongbah Shillong.

Ha kane ka jingialang ne Summit la wan iashim bynta lang da ki kynhun bapher bapher ban iamir jingmut halor ka mat kaba kongsan kaba iadei bad ka E-Waste Management bad recycling hapoh kane ka thain shatei lammihngi (Northeast) jong ka ri India.

Ha kane ka jingialang la ia don lang u R Nainamalai, Chairman ka Meghalaya Pollution Control Board, Dr. GH Chyrmang, Member Secretary of Meghalaya Pollution Control Board bad u Nandan Mall, Founder bad CEO ka Hulladek Recycling.

Kane ka jingiadon ryngkat ka jong ki ka pynpaw ruh halor ka jingkongsan ban shim ia ki sienjam ban iatreilang na ka bynta ban tehlakam ia ki jingeh kiba mih lyngba ki e-waste ne ki tiar electronic kiba la sniew.

“Ka Meghalaya Pollution Control Board ka ieng halor ka nongrim ban ai ka jingkyrshan halor ka jingthmu ban pyntreikam ia ki sienjam ban kyntiew ia ki lad ki lynti ban tehlakam ia ia ki e-waste. Kane  ka jingialang ka dei ruh kaba kongsan ban kynjoh sha ka thong ban pyntreikam pura ia ka e-waste management ha ha ki jylla jong ka thain Northeast,” ong u . Nainamalai, u Chairman Meghalaya Pollution Control Board.

“Ka thong ka jong ngi ka long ban pynthikna ha ki jingtreikam ki ban iada ia ka mariang lyngba ka jingialeh ban tehlakam ia kine ki tiar ki bym pyndonkam shuh. Ka jingiatreilang bad ki nongialam jong ki karkhana kiba kynthup ia ka Tata Rewire, Mahindra Cero, bad Lico Waste Materials Pvt. Ltd. kan nangpynkhlain ia ka rukom treikam bad pyniar ia ka jingshakri  ka jong ngi,” ong u Nandan Mall, Chairman & Managing Director, Hulladek Recycling Pvt Ltd.