Ïatreilang ka koit ka khiah ban ïakhun ïaki jingpang bym saphred

Syllad | The Rising MeghalayaJanuary 29, 2019

JOWAI:  Ki artylli ki tnad treikam jong ka Koit Ka Khiah ka District West Jaiñtia kila ïatreilang ban ïakhun ïaka jingpang bym saphred.

Kine ki tnad ki dei ka AYUSH bad ka Non Communicable Disease (NCD) West Jaiñtia Hills District. La plie ïaka jaka treikam jong ki haka sngi Ba Ar ha ha Jowai Civil Hospital, Ialong da ka Additional Deputy Commissioner, West Jaiñtia ka kong Rimaya Manner.

Kane ka tnad treikam ka dei ka prokram ka tnad ka koit ka khiah –ka ‘Integration of Ayush with National Programme for Prevention and Control of Cancer Diabetes Cardio Vascular Diseases and Stroke (NPCDCS), National Health Mission, Meghalaya’.

La ïatreilang kine ki tnad namar ka jingkylla ka rukom pang ki briew ha Ri India bad ka ri kala shah ktah bha haka jingpang bym saphred (Non-Communicable Diseases (NCD)) kum haka jingpang stroke, cancer, klongsnam, ka shitom ring pynhiar mynsiem bad kiwei kiwei ban ïaki jingpang ba saphred kiba tip kum ki ‘Communicable diseases’ -jingpang na ki um ki wah, ka jingdait u kaiñ u pyrjong kaba wanrah ïaka malaria bad kiwei, ka TB bad ka HIV.Ka sorkar kala maitphang da ka National Programme ban ïakhun pyrshah ïa kane ka jingpang bym saphred naduh u 2010 ha ki 100 tylli district, 21 Jylla.

Ka jingthmu ba kongsan jong kane prokram ka dei ban ai jinghikai ïa kino kino kiba ngat ha ka jingpang ban sumar kloi ban ïoh ka jingïada ban lait na ki jingeh bad jingjia ba sngewsih.

Katkum ka kaiphod ka kaba la pynmih da ka World Health Organisation (WHO) ba ka jingïap na ka kane ka jingpang kala kot 60% hapoh ka ri bad la kdew ba kane ka jingpang bym saphred ka ktah bunshah ban ïaka jingpang ba saphred me ïabit.

La plie ïaka tnad ka AYUSH bad NCD ban ai jingïarap ïaki nongpang bad ban ïasyllok ba ki ban ïoh ai ka jingsumar haka por kaba biang.

Shuwa ban plie kala don ka jingïalang kaba lyngkot kaba ka Kongsan ka Kong Rimaya Manner kala kitbok kitrwiang ïaka NCD bad AYUSH ba kin ai ka jingshakri kaba bha tam ïa u nongpang. La ïadonlang ki doktor kiba sumar ïaki jait jingpang bapher bapher na ki CHC, PHC bad kiwei kiwei.