Iasoi MoU ka tnad Education bad NSE ban aijinghikai ia ki samla pule halor ka banking bad insurance

Syllad | The Rising MeghalayaNovember 29, 2024

Ka Tnad Education ka sorkar Jylla ha ka 28 tarik Naiwieng ka la iasoi ia ka Memorandum of Understanding (MoU) bad ka National Stock Exchange (NSE) ha ka jingiadon lang u Myntri Rangbah ka Jylla u Conrad K Sangma, Myntri ka Tnad pule puthi u Rakkam A Sangma, u Chief Secretary Bah DP Wahlang lem bad ki ophisar ka Tnad pule puthi bad NSE.

Ia kane ka MoU la iasoi da ka jingthmu ban aijinghikai sha ki samla pule college ka Jylla halor ka bynta kaba iadei bad ka Banking, Insurance bad kiwei kiwei.

U Myntri Rangbah ha ka jingkren u la ong ba ka jingnang jingtip bad ka jingtbit ha ka liang ki kam pisa tyngka ka dei kaba ki nongseng kam bad ki samla pule ka jylla ki dang duna shibun.

U la ong ruh ba ka jingai jinghikai lyngba ka NSE halor kane ka bynta kan iarap shibun ban lah ban shim ia ki rai ha ka lynti kaba dei ha ka liang ka kam pisa tyngka, bad kan iarap ruh ban pyllait na ka jingduh nong bad ban ioh ia ka lawei kaba shngain da ka lynti ka jingshemphang bad ka jingshim rai kaba stad.