Iasnohkti ka Jylla ha ka jingpynsawa siren bad ‘Black Out’ ban pynkhreh na ka jinghiar thma liengsuin

Syllad | The Rising MeghalayaMay 8, 2025

Ha ryngkat ka ri baroh kawei ka Jylla Meghalaya haka sngi Balang ka la iasnohkti lang ban pynlong ia ka Civil Defence Exercise on Air Raid bad ka jingpynlip bording ne ‘Black Out’ kum ka jingpynkhreh lada jia shisha ka jingwan hiar thma ki liengsuin iapom jong ki nongshun.

Ka jingpynlong ia kane ka Mock Exercise ka long ruh katkum ka jingbthah da ka Ministry of Home Affairs bad kaba dei ruh ka sien kaba nyngkong eh ban pynlong ha ka jylla naduh ka thma kaba la jia hapdeng ka India bad ka Pakistan ha u snem 1971.

Ha Meghalaya la pynlong ia kane ka Mock Exercise da ka Directorate of Civil Defence & Home Guards ha baroh ki 12 tylli ki District da kaba kham pynleit jingmut ha ki laitylli ki District jong ka East Khasi Hills, West Jaintia Hills bad West Garo Hills.

La sdang ia kane ka Mock Exercise ha ka por 4 baje janmiet ha kaba ki dkhot ka Civil Defence ki la pyniaid shakhmat ia ka kam naduh ki shnong ki thaw lyngba ki Civil Defence Warden Services bad local Civil Defence Volunteers bad ha ki District level lyngba ki District Magistrate kum ki Controller Civil Defence kiba la shimti ban pyniaid ia ki sienjam ha ryngkat ka jingkyrshan lang lyngba ki Deputy Controllers Civil Defence, Quick Response Team na ka Civil Defence & Home Guards, State Disaster Response Force (SDRF), Police, Fire and Emergency Services bad District Disaster Management Authority (DDMA) jong baroh ki  District.

Ha ka Jylla ka State Disaster Management Authority (SDMA), ka Air Force Station bad ka 101 Area jong ki shipai ki la iashim bynta   lang ha ka Civil Defence Exercise kum ha kaba wad bad pyllait im na ka iing kaba la khyllem ha kaba ki dkhot ka Civil Defence Volunteers and Wardens ryngkat ka kynhun Quick Response Team jong ka Civil Defence bad Home Guards, nangta ka jingjia pluh ding ba la wan ban tem mardor da ki dkhot na ka tnad Fire & Emergency Services ryngkat ka kynhun ba la pyntbit ha ki kam pyllait im nalor ka State Disaster Response Force (SDRF).

Katba ha ka por 6:28 janmiet la pynsawa ia ka Air Raid Siren hajan baroh kawei ka jylla na ka byna ar minit ha ka rukom kaba pynheh bad pynrit ia ka jingsawa kaba pyni ia ka dak jong ka jingwan ki liengsuin iapom jong ki nongshun. Ha ka por 6:30 janmiet jan baroh kawei ka jylla ka la dum tliw kaba long shibynta jong ka jingpynlip ia ka bording ne (Black Out) ha baroh ki iing ki sem kaba la neh ar minit bad la bteng ia ka jingpynsawa ia ka siren na ka bynta shi minit.Hadien kane ka jingpynlong ia ka Mock Exercise ka la kut noh da ka jingjop.

“Ia kane ka Civil Defence Exercise la pynlong shibynta ban khmih bniah halor ka jinglong ba la pynkhreh jong ka tnad Civil Defence ha ka Jylla lada jia ba wan ka thma,” ong u MK Sangma, Joint Director of Civil Defence haba kren sha ki lad pathai khubor hynne ka sngi Balang.

Nalor kata u pyntip ruh ba ia kane ka Civil Defence Exercise on Air Raid la pynlong ha ka sien kaba nyngkong eh ha ka jylla hadien jong u snem 1971. U la ong namar ka jingai jingtip kaba kyrkieh kumta kane kan dang dei tang ka kylla kaba nyngkong jong ka Exercise bad ha ki por ki ban dang wan yn sa pynlong ia kiwei pat ki Exercise ba pura.