Iashimbynta u Myntri Tourism haka iew Sohshan ha Khyndailad

Syllad | The Rising MeghalayaMay 1, 2024

U Myntri ka Tnat Tourism u Bah Paul Lyngdoh haka 30 tarik Iaiong, u la leit ban iashim bynta ha ka iew Sohshan ne ‘Strawberry Market’ ba la pynlong ha Khyndailad, Shillong shibynta ban pynshlur bad aimynsiem ia ki nongrep. Kane ka iew kan neh haduh 3 tariki Jymmang.

Haba kren sha ki lad pathai khubor une u Myntri u la ong, “Ha ka sien kaba nyngkong ka Tnat Toursim ha ryngkat ka jingiatreilang bad ka Tnat Horticulture ki la iaid shakhmat ban pynlong ia kane ka tamasa shibynta ban pynpaw pyrthei ia une u jait soh bad kiwei pat ki soh bad ki khur ba la pynlong na ka jylla khnang ban khring ia ki nongwan jngohkai na kylleng.

“Dang ha kine ki khyndiat taiew ba la dep la lah ban pynlong ia ka ‘Strawberry Festival’ ha ki shnong kiba pynmih ia une u jait soh ha Nohron, Syntung bad ha Sohliya shibynta ban pynsngewthuh sha ki paidbah halor ka jingdonkam ban pynshlur bad ai mynsiem na ka bynta ban kyntiew ia ka jingpynmih ia ki jait soh bad ki jhur ki jhep kiba khlem ai dawai, ha kaba mynta ka sngi la lah ban sakhi ia ka shi jam da kaba wanrah ia kine ki mar sha ka nongbah ka Jylla. Ka jingthmu ka long ruh ym tang tang ba une u jait soh u dei uba don ia ka iew kaba heh na ka bynta ki nongrep, hynrei ka lah ruh ban long ka kabu ban kyntiew ia ka ioh ka kot na ka bynta ki nongrep ki jong ngi,” ong u Bah Paul.

Nalor kata u la ong ruh, “Ka bynta kaba kongsan ka long ba ngin lah ban pynneh ia kane ka sienjam ia kaba ngi la kyrpad ruh ia ki paidbah kumjuh ia ki nongwan shangkai sha Meghalaya ba kin wan jngoh ia ki jaka die ia kine ki jait soh hapdeng jong ka nongbah ka ban long ruh kum ka jingpynshlur ia ki nongrep ka jylla kiba rep bad pynmih ia u Sohshan khnang ba shen kumba long u Sohtrun u Sohshan ruh un sa kylla pawkhmat ha ka pyrthei hi baroh kawei.”

Haba kylli une u Myntri u la ong ba u Sohshan u dei uwei na ki jait soh uba kham pher ia kiba la rep bad pynmih na kane ka jylla bad uba dei ruh uba iaid iew bha namar ka jingbang jingshngain.

Shuh shuh une u Myntri u la ong ruh na ka liang ka sorkar kan ialeh ban pyninam ia ka mar ba pynmih na ka jylla khnang ba kan khring ia ki briew kiba na bar ba kin pynsaphriang sha kiwei pat shaphang ki soh ki jhur kiba mih na kane ka jylla, bad na ka liang ka sorkar ruh kan shim ia ki sienjam ban ka jingkyrshan na ka bynta ki nongrep.