Ïashimbynta ka CoMSO haka North East People‘s Conference ha Manipur; la thaw ïaka NEFIP ban ïakhun ïaka jingeh ki riewlum bad trai ri trai muluk

Syllad | The Rising MeghalayaApril 5, 2019

JOWAI: Ka Confederations of Meghalaya Social Organisations (CoMSO) ka la leit ban iashim bynta ha ka 1st North East People Conference 2019 ha Imphal, Manipur.

Ha kane ka conference hadien ka jingiathir jingmut sani bha halor ka jingeh jong ki trai ri trai muluk jong ka thain Shatei Lammihngi la thaw ïa kawei ka forum kaba kynthup lang ïa baroh ki seng trei mon sngewbha kaba la ai kyrteng ka North East Forum for Indigenous People (NEFIP).

Ïa kane ka conference la pynlong da ka Manipur People’s Against Citizenship (Amendment) Bill, 2016 (MANPAC) ka seng kaba kdup lang ha kawei ka lama ïaki 84 tylli ki seng ban pyrshah  ïaka CAB ha jylla Manipur naduh 1 tarik haduh 3 tarik une u bnai Iaiong kaba la wan ban ïashimbynta da ki sengbhalang bapher bapher ka thaiñ  Shatei Lammihngi lait noh ka Sikkim.

Ka kynhun  jong ka CoMSO kala leit ïashimbynta ha katei ka conference haka jingïalam u Chairman CoMSO, u Bah Robertjune Kharjahrin uba long u President ka HYC ha ka jingdon ryngkat ki Nongialam jong ki seng bapher bapher kiba don hapoh ka kynhun jong ka CoMSO.

Ha kane ka jingialang nyngkong eh, ki sengbhalang bapher bapher jong ka thain Shatei Lammihngi kila iakynduh lang ha kawei ka jaka na ka bynta ban ia thir bad ia mir jingmut halor ki jingeh bapher bapher kiba ki trai ri trai trai muluk ki iakynduh na ka por sha ka por.

Ha kine ki lai sngi ba la pynlong ia kane ka Conference lai iatai bad iathir sani bha kumno ban wanrah ia ka jingiatylli hapdeng ki sengbhalang jong ka thain bad ruh ban pynpaw ia kawei ka sur kaba tylli lang mlon ha kino kino ki khep kiba ki nongshong shnong ka thain ki ia kynduh jingeh.

Da kawei ka jingmut la rai ban thaw ia ka synjuk ki Sengbhalang ka thain Shatei Lammihngi ia kaba la ai kyrteng ka North east Forum for Indigenous People (NEFIP). La jied Convener jong ka Core committee ia u Ningthouja Lancha na Manipur bad 3 ngut ki nongmihkhmat na kawei ka jylla kum ki dkhot kane ka Core Committee. Ia ki nongkitkam ba pura yn sa jied ha ka jingialang jong ka core Committee ka ban sa long shen ha Shillong.

Ha kane ka conference da kawei ka sur la shim ban pyrshah ia ka CAB, la rai ban pyrshah ia baroh ki polisi treikam ka sorkar India kiba ktah mationg ia ka thymmei ka bat khyndew bat shyiap, ka hok kyrpang, ki riti dustur jong ki trai ri trai muluk jong kane ka thain bad kane ka synjuk kan kyrshan ia baroh ki sengbhalang ha ka thain kiba dawa ia ka ILP System, NRC bad kiwei ki aiñ iada jingrung kyrthep ki mynder ri hapoh ka jylla.