Iarap ka OCF da ka bai skul bad marbam ia ki khunswet bad kiba don jingduna ha Priang

Syllad | The Rising MeghalayaJuly 25, 2023

Orphan Children Foundation, Jaintia Hills hapoh ka jingialam jong u Founder Chairman u Ma L Dkhar ka la pynlong ka jingai jingiarap da ka bai skul kaba 3 bnai bad ruh da ki marbam sha ki khynnah khunswet kumjuh sha ki khynnah kiba don ka jingduna ha ki dkhot met kiba don hapoh  ka shnong Priang West Jaintia Hills haka sngi Nyngkong.

Ha kane ka sngi la pyniad ia ka jingialang kaba rit da ka kong M Bareh Office Secretary Orphan Children Foundation West Jaintia Hills bad la ioh ruh ka jingkren lyngkot na u Waheh Shnong Priang West Jaintia Hills u K Shullet.

Haba ai jingkren ha ka jingialang na ka liang u Waheh Shnong u la iaroh bad ai khublei ia ki nongialam ka Orphan Children Foundation ki ba la lah ban poi hapoh ha kane ka Shnong na ka bynta ban aijingiarap  ia kum kine ki khynnah kiba donkam shisha ia ki lad jingiarap.

Nalor kata la ioh ruh ka jingkren na u Founder Chairman ka Orphan Children Foundation Jaintia Hills u Bah L Dkhar uba la pynpaw ba ka Orphan Children  Foundation ka lah ban trei kam ha baroh ki bynta jong ka Ri lum Jaintia khamtam sha ki thain nongkyndong,  bad u la ong ruh ka thong kaba ha khmat eh jong ka Orphan Children Foundation ka long ban pynbiang tarajur ia ki khynnah lada long ki khynnah khunswet khun riewspah bad khun baduk ki dei ban ioh kajuh ka jingieid kumba kiwei ki khynnah ki ioh bad ym dei ban niew shiliang ia ki .

Shuh shuh u la ai mynsiem ruh ia ki wat lada kim don kmie don kpa, ki duna ha ki dkhot met ruh hynrei ki dei ban iai minot ha ki jingpule khnang ba phin poi sha khmat kumba long  kiwei pat ki para khynnah. Ha kajuh ka por u la kyntu ruh ia u Waheh Shnong ba kin sngewbha ban ai ka jingiatreilang bad ka OCF khnang ba kin nang iai lah ban bteng ia ka kam jingiarap.

Ha kane ka sngi la ioh ruh ban iarap ia ki khunswet bad kiba don jingduna ha ki dkhot met hapoh ka shnong Iooksi Umdienglin ha ka jingiadon lang ki volunteer jong ka OCF West Jaintia Hills u D Bareh nalor I Kong M Lyngdoh.