Iamir jingmut ka BSF-HYC namar ka jingkiew ki kam sniew ha ki thain khappud

Syllad | The Rising MeghalayaApril 26, 2025

Namar ka jingkiew jong ki kam sniew bad ka jingwan rungtuh jong ki nong Bangladesh lyngba ki thain khappud jong ka Ri, ki shipai Border Security Force (BSF) ha ryngkat ka Hynniewtrep Youths Council (HYC) –Jatap unit bad Shella area unit ha ryngkat ki nongshong shnong haka 25 tarik Iaiong ki la pynlong ia ka jingialang Joint Coordination ha BOP Beltoli.

Ha kane ka jingialang ki nongmihkhmat na ka HYC ki la pynpaw sha ki heh BSF halor ka jingkiew jong ki kam sniew ha ki thain khappud bad halor ka jingioh wan rungtuh jong ki nong Bangladesh na shiliang khappud kaba buh ka jingma ym tang ia ki paidbah kiba don ha ki thain khappud hynrei ia ka Ri hi baroh kawei, ong u Vice President ka HYC, Shella u bah B Natep.

Kumta na ka liang ka HYC ka kyntu jur ia ki BSF ba kin long kiba peitngor bad pyrkhing ia ka jingpahara ha ki jaka khappud jong ka ri bad ban shim ia baroh ki sienjam ban pynpulom ia ki kam sniew kiba harukom lyngba ki jaka khappud.

Ka HYC ka la kular ruh ban ai ka jingiatreilang bad ban iarap lem ia ki shipai BSF ban pynlong ia ki jaka khappud kiba shngain bad kiba lait na kiba bun ki jingma.

Kane ka jingialang ka la kut da ka jingshim rai ban iatreilang na ka bynta ban rat dyngkhong ia ki jingsniew kum ki kam khaii tuh, ka jingmih jingrung beain lyngba ki jaka khappud.