Ïakynduh Myntri Koit Khiah ka SEPSD & dawa kynriah ïaka kharkhana saiñ rnga dewiong ha East Jaiñtia

Syllad | The Rising MeghalayaMay 15, 2019

JOWAI: Ki nongialam jong ka Society for Environment Protection and Sustainable Protection (SEPSD), hynnin ka sngi 14.05.2019, ka la leit ban iakynduh ia u myntri badei peit ia ka koit ka khiah bad kiwei u Bah Alexander L. Hek, ban dawa pynkynriah noh ia kawei ka kharkhana saiñ rnga dewiong kaba la tip kum ka Abhi Coke, kaba don ha Mookhep East Jaiñtia Hills District, ha shwa ban poi Ladrymbai.

Ka seng haka dorkhat ba la ai ha u bah Hek, ka la kdew ba kane ka kharkhana (Abhi Coke) kaba don harud u surok bah bad marjan bad ka Good Shepherd Secondary School, Mookhep, ka la pynmih ka lyer sniew bad ki jaboh na ki pum pum ne tdem kane ka kharkhana kaba ktah ia ka koit ka khiah jong ki nongshnong shnong bad ia ki khynnah jong kane ka skul.

U President SEPSD Wanbun Dkhar u la ong ba kane ka kharkhana kaba don hangne kala treikam mynta da ki bun bun tylli ki snem, kaba la wanrah ka jingeh bad ka jingma kaba khraw ia ki paidbah bad ia ki sawdong sawkun jong ka mariang, kumjuh ruh kane ka  kane ka kharkhana ka la iaid lait ia ki aiñ ki kyndon ba iadei bad ka mariang bad kane ka kharkhana ka dei ban jngai  naki shnong ki thaw ne na ki jaka paidbah.

Na ka liang ka SEPSD ka kyntu  ia u myntri ka koit ka khiah ban kynriah noh mardor ia kane ka kharkhana sha kiwei pat ki jaka kiba jngai naka shong ka thaw ne ki jaka pule, namar kum kine ki jait kharkhana ki pynmih shibun ka tdem kaba sniew kaba ktah ia ka koit ka khiah jong ki briew kiba don sawdong kane kharkhana.

KA SEPSD kala ai jingtip ruh ia kane ka jingdawa pynkynriah ia kane ka kharkhana,  sha U Deputy Commissioner East Jaiñtia Hills District, Divisional Forest Officer (T) Jowai, Directorate of Commerce and Industries Government of Meghalaya, Shillong, Chief Forest Officer JHADC bad sha u Member Secretary Meghalaya State Pollution Control Board.

Na ka liang u Bah AL Hek u la kular ïaak SEPSD ban shimkhia ia kane kam bad u la ong ruh ba un phah shithi sha baroh kitei ki department na ka bynta ban kynriah noh sha wei ia katei ka kharkhana bad lada ym don lad ban pynkynriah lah ban khang noh ne pynsangeh treikam noh ia kane ka kharkhana.