Iakynduh ki dkhot ka NCW ia u Lat ka Jylla, pynpaw halor ki jingeh jong ki kynthei ha ka Jylla

Syllad | The Rising MeghalayaNovember 20, 2024

Ka Kong Deblina Khongdup ha ryngkat 2 ngut ki dkhot jong ka National Commission for Women (NCW) ha ka 19 tarik Naiwieng ki la leit ban iakynduh ia u Lat ka Jylla u CH Vijayashankar hapoh Raj Bhavan, Shillong.

Ha ka jingiamir jingmut, ka kynhun ka NCW ka la pynpaw ha u Lat halor ki sienjam kiba ka Commission ka la shim na ka bynta ban aijingiada bad kyntiew ia ka hok jong ki kynthei hapoh ka Ri, kata da kaba pynleit jingmut kyrpang hapoh ka jylla Meghalaya.

Ha kane ka jingleit iakynduh kane ka kynhun ka la ai sngewbha ruh ia u Lat da ka Khasi Calendar kaba nyngkong eh ia kaba la shna katkum ka Lunar Cycle kaba kynthup ia ki 13 bnai bad ka 8 sngi ha ka shitaiew.

Nalor kata ki la iakren ruh halor ki jingeh bapher bapher kiba ki kynthei ki iakynduh ha ka Jylla bad halor ka jingdonkam ia ka jingiatreilang ban pynthikna ia ka jingpynkup bor bad na ka bynta ka bha ka miat ka jong ki.

U Lat u la iaroh ia ka jingpyrshang jong ka NCW ban weng ia ki jingeh jong ki kynthei bad ban iada ha kaba iadei bad ki hok jong ki kynthei.