Ïakylliang jingnang jingtip bad ka jingtbit ki khynnah skul ha sor bad nongkyndong

Syllad | The Rising MeghalayaApril 25, 2019

PDENGSHAKAP: Ka District School Education Officer, West Jaiñtia Hills District kala pynlong ïaka prorkam kaba tip kum ka”Exchange of Knowledge & Skills” kaban plie lad plie lynti ïaki khynnah skul ha nongkyndong kiba don ha ki thain khappud bad sor ba kin ïasam mar kylliang ïaka jingnang jingtip bad ka jingtbit ha ki kam bapher bapher.

Ïa kane ka prorkam ka tnad pule puthi ka district kala pynlong ha ka shnong Pdengshakap, Amlarem Sub-Division ha ryngkat ka jingïatreilang ka tnad Border Areas Development West Jaiñtia Hills District. Kane ka prokram kan neh lai sngi lynter naduh ka 25-27 tarik u bnai.

La shna kyrpang ïaki ïing sher dara ban sah ki khynnah skul ha phyllaw jong ka skul Pdengshakap Secondary School, Amlarem Sub Division.

U Ma Ohiwot Laloo Staff Assistant DSEO, Jowai haba kren maitphang ula ong ba ka jingpynlong ïa kum kine ki prokram kalong ban wanrah jingïatylli hapdeng ki nongshong shnong hapoh ka Ri India, bad kane kan urlong tang lada ki khynnah skul kin ioh ka jinghikai kumno ban long kawei bad ban ïasngewthuh hadpeng ki para khynnah skul na kawei ka jaka pule sha kwei pat namar ba ha skul la khleh lang ïa baroh ki jaidbynriew, kolshor bad niam.

Ki don 13 tylli ki skul kiba iashimbynta ha katei ka prorkam, 10 skul na sor Jowai bad 3 tylli kiba don ha katei ka sub-division kaba don ha khappud India-Bangladesh.

U Bah Golden Rani, Assistant Director Border Area Development haba kren kum u kongsan kum kane ka prokram jingiakynduhlang  khynnah skul la pynlong haki 17 tylli ki Jylla jong ka Ri kiba iasam pud bad kiwei pat ki ri. Ka jingthmu jong kane prokram kalong ba ki khynnah kin ioh ka lad ban ïasam jingnang jingtip bad ki buit ha ki kam bapher bapher ban kyntiew ïaka long briew man briew bad ka akor ka burom ban long kita ki myntoi ka imlang ka sahlang.