Ïakhih syndet ki samla pule ka Kiang Nangbah Govt. College

Syllad | The Rising MeghalayaMarch 12, 2019

JOWAI: Na ka daw jong ka jingbym wan tista ki nonghikai ha ka ‘Morning Shift’ ne haka klas mynstep haka kyrdan Bachelor of Arts (BA), ki seng samla pule hapoh ha lama Kiang Nangbah Government College Student Union (KNGCSU) kyndit kynsan kila pynlong ïaka jingïakhih ha phyllaw ka kolej bad rah ryngkat bad ki jingthoh placard haka sngi ba Ar.

Ha kane ka jingiakhih la iashim bynta da ki spah ngut ki samla pule katei ka kolej haba ki la rah ruh ia ki placard kiba pynpaw ia ki jingdawa jong ki ban pynkiew tulop ia ki nonghikai ‘Morning Shift’, ka jingplie noh ia ka girls hostel.

Haba iadei bad ka internal test namar ki samla pule jong ka BA Morning Shift kim ïoh klas ne jinghikai kaba biang la kyntu ïa u Principal ban iarap ïaki samla pule.

Ka jingiakhih ka la sdang naduh 7 baje mynstep haduh 10 baje mynstep haba ki samla pule ki la ialum ha phyllaw ka kolej.

Hadien bala poi u Principal ka kolej, ki nongialam jong ka Kiang Nangbah Government College Students Union ki la leit iakren bad u halor kitei ki jingdawa jong ki.

U Principal u la mynjur ban ai marks kaba biang ia ki samla pule kiba iakhun ia ka eksamin bad u la iathuh ba ki nonghikai jong ka Morning Shift kin sa ïoh tulop noh shen.

Ka sorkar ka la thung 16 ki nonghikai na bynta ka Morning Shift jong ka BA ha ka jingsiew kaba San hajar tyngka bad ki khlem shim ioh tulop haduh shi snem.

Ki nongialam jong katei seng samla pule kan sa leit iakynduh ia u Myntri Ka Tnat Pule na bynta ban buh ki jingdawa jong ki ban thung nonghikai pura jong Morning Shift, ban plie noh ka girls hostel bad maramot ka boy’s hostel.