Iaid shait shait ka jingpynkhreh tei museum ka KNIKMS ban pynsah nam ïa U Kiang Nangbah

Syllad | The Rising MeghalayaDecember 30, 2020

Ki paidbah nongshong shnong ka Rilum Jaintia haka sngi Balang kila rakhe pyndonburom ïaka lyngkhuh sngi iap ba 158th U Kiang Nangbah, u khlawait bad nongialehlaitluid ka Ri Jaintia.

Ha kane ka sngi ka Kiang Nangbah Iasiat Khnam Memorial Society (KNIKMS) kala rai ban buh iaka museum ban pynsah nam ia U Kiang Nangbah ha Madiah Kmai Blai kaba la pynieng ia u mot sahnam U Kiang Nangbah.

Kane ka madan la pynkylla kyrteng kum ka Kiang Nangbah Memorial Park, Syntu Ksiar, kaba dei kawei na ki jaka ba khring iaki nongwan jngohkai. Kane ka jaka ka don harud ka wah Myntdu kaba la jied ïa U Kiang Nangbah kum u nongialam ban iakhun pyrshah iaka sorkar phareng. 

Ha kane ka museum yn buh jingthoh iaka jaka ba kha ia U Kiang Nangbah ha Kper Nangkhlieh, Tpep-pale, ka jaka kaba ka sorkar phareng kala kem ia u ha Umpara bad ka jaka kaba la sdien phasi ia u ha Iawmusiang, Jowai.

U president KNIKMS Pearlet Toi ula ong ba ka jingpynkhreh iaka museum kala iaid shait shait. “Ngi la dep ban pynkhreh nadong shadong bad mynta kaba sah kalong satang ban pyndep iaka detailed project report (DPR),” la ong u ma Toi bad ula ong ba ia kane yn ai sha ka sorkar shuwa u bnai Lber 2021.

Shuwa kane ka KNIKMS kala pynlong iaka prokram kaba lyngkot kaba iadonlang u MLA ka Jowai u ma Wailadmiki Shylla kum u kongsan bad kiwei kiwei ki nongialam ka KNIKMS bad la buh syntiew ruh ha u mot Kiang Nangbah.

Ha kane ka jingbuh syntiew la iashimbynta ka JSU, tnad Pulit bad kiwei kiwei.

U MLA ka Jowai ula kular ban synniang T.2 lak 50 hajar ban shna ïaki kynroh kiba la shah bam haka umsaw ha Madan Madiah.

Ka Seinraij Jowai, Ka Lei Synshar Cultural Society kala buh syntiew ha u mot U Kiang Nangbah ha Mooliksoo. Katba ka Iongpiah Loompyrdi, Jowai kala pynlong iaka jingainguh aidem ha ïungwalieh ka Loompyrdi, Iongpiah haka por mynstep bad haka por nohphai sngi la pynlong iaka jingialang ban kynmaw burom ia U Kiang Nangbah.

U Ma Firstborn Laloo ula iathuh iaka khana shaphang ka jingim U Kiang Nangbah bad la sam ruh iaki khusnam sha ki nongjop ha ki jingialehkai bapher bapher.

Ka JNC, JSU, Khliehriat, AJYWO, KSU kila buh syntiew ha u mot U Kiang Nangbah ha Khliehriat.

Ka SKSR 12 Daloi kala rakhe ia kane ka sngi ha Thadmuthlong C Phramer West Jaintia Hills District.

Ban pynphuh phieng ia kane ka sngi la ioh ka jingshad lariti tynrai kaba la iahimbynta da ka Seiñ Raij Muthlong, ka jingiakop siat khnam kaba la shimbynta da ka seinraij Khliehriat, Nangbah, Diengshynrum, Sabahmuswang nalor kiwei kiwei ki raij.