Iaid beit ka jingshna surok ka Assam, kynnoh kyntur jaka sha Lapangap

Syllad | The Rising MeghalayaJuly 22, 2019

LAPANGAP: Watla ka bor synshar district jong ka West Jaiñtia Hills District kala hiar pynsangeh ïaka jingshna surok ka sorkar Assam ha Tahpat kaba thmu pyniasoh bad ka shnong Khanduli haka 8 tarik une u bnai, hynrei la lap ba ka jingpyntrei ïa kane ka surok kala iaid shait shait mynta.

Ki nongialam shnong jong ka Lapangap kiba maramot paidbah ïaka surok shnong naduh na Khanduli sha Lapangap haka sngi Saitjain kila hiar jurip ïa katei ka surok bad kila lap ba ka jingtrei kala ïaid shait shait bad la lap ruh ïaki nongbylla kiba pyntrei ïaki kynroh bad nala katei ka surok.

Ki nongialam shnong kila kynnoh ba kane kala paw shai kdar ba ka sorkar Assam kam burom ïaka Jylla Meghalaya bad kala pyntrei jubor ia ka surok naduh ka Shnong Tahpat (kaba hap hapoh Assam) bad iaid lyngba ki kyndon kynshrot jong ka shnong Langkerroi shaduh ka shnong Khanduli (kaba hap hapoh Meghalaya).

Ha kane ka jingjurip ki nongialam shnong ka Lapangap la lap ïaki trok bad ki puh shilum kiba thep khyndew bad ki nongtrei kiba dang shna kynroh nalor ki hume pipe da ki phew tylli kiba la pynpoi ha katei ka jaka.

Kane ka jingiaid beit ka jingshna surok ka sorkar Assam ha katei ka jaka kala pynbitar iaki nongshong shnong bad nongialam shnong jong ka Lapangap namar katei ka surok ka iaid lyngba ka Shnong Lapangap bad ki jaka rep jong ki nongshong shnong.

Ka Dorbar Shnong Lapangap kala pynpaw iaka jingpyrshah jong ki halor katei ka jingkyntur jaka jong ka Sorkar Assam.

Ki nongialam shnong ka Lapangap kila pynsangeh ia katei ka jingshna surok hynrei ki nongbylla kiba dei na ka jaidbynriew Karbi kila pynphai ktien ba ki la ioh bor na ka Assam ban bteng ia ka jingshna surok.

Ki nongialam shnong ka Lapangap kin sa pynlong ia ka jingialang ban pyrkhat kumno ban jam shakhmat ban pynsangeh noh ia katei ka jingkyntur pud jong ka Assam bad la rai ruh ban pyntip biang sha ka bor District jong ka West Jaiñtia Hills.