Ïada iaki mrad khlaw & jaka sah jong ki ban kyntiew ïaka ioh ka kot ong HC Chaudhary, Addl. PCCF

Syllad | The Rising MeghalayaJune 6, 2019

KHLIEHRIAT: U Additional Principal Chief Conservator jong ka Forests u HC Chaudhary ula khot ula wer ïaki paidbah ban ïasnoh kti lang bad ka tnad Forests ha kaban ïada ïa ki mrad khlaw bad ia ki jaka sah jong ki ban kyntiew ia ka ioh ka kot bad ban wanrah ia ka roi ka par.

U HC Chaudhary, Additional Principal Chief Conservator jong ka Forests, uba long ruh u Chief Wildlife Warden, Meghalaya ula ong ïa kane haba kren haka prkram ai jinghikai ka ophis jong ka Divisional Forest Officer, Jaiñtia Hills Wildlife Division haka ha ka 1 tarik une u bnai Jylliew haka shnong Khaddum, East Jaiñtia Hills District.

Kane ka jingai jinghikai kadei halor ka phang ban pynsngewthuh paidbah ia ka jingdonkam ban ïada bad ban pynneh pynsah ïa ki mrad khlaw ban kyntiew ïaka ioh ka kot da kaba ïada ia kine ki mrad khlaw bad ïa ka jaka sah jong ki.

U HC Chaudhary haba kren shuh shuh ula ïaroh ïaka jingitynnad ka shnong Khaddum kaba don ki khlaw ki btap kiba itynnad bad ïa ka jingitynnad jong ka Wah Lukha. U la ong ruh ba ïa ka Shnong Khaddum lah ban kyntiew kum kawei na ki jaka jngoh kai pyrthei kaba pawnam.

U HC Chaudhary u la kyrpad nongshong shnong ka Khaddum ba kim dei ban pyniap ïa ki mrad khlaw, ipom pathar ia ki dieng bad khot wer ïaki paidbah nongshong shnong ban ïasnoh kti lang bad ka tnad Forests ha kaban ïada ïa ki mrad khlaw bad ia ki jaka sah jong ki ha kaba ka tnad forest kan ai ia ka lad jingiarap ha ka ban kyntiew ia ka ioh ka kot bad ban wanrah ia ka roi ka par ha katei ka shnong.

Ula kyntu ïaki ban kin sdang ban phai khmat sha kiwei pat ki lad kamai kum ka kam ri jingri, kam suh jain, kam Ri Ngap bad kumta ter ter kiba lah ban kyntiew khambun ha ka ioh ka kot bad ha kajuh ka por u la ai jingmut ia ki nongialam shnong ba kin shna ia ka committee ïada mrad bad ban wanrah ia ka roi ka par hapoh ka shnong. U la ong ruh ia kane ka committee dei ban register hapoh ka ophis jong ka Divisional Forest Officer, Jaintia Hills Wildlife Division.

U Dr. Z Changsan, Regional Director, Central Pollution Control Board u ba la iadonlang ha katei ka sngi haba ai jingkren u la ong ba ka jingdonkam ban iada ia ka mariang bad ia ki jongdon jingem hapoh jong ka kam dei shuh ka mat kaba thymmai namar ia kane la hikai naduh ka kitab Genesis ha kaba u Blei u la thaw ia u briew ryngkat bad ka hukum ban ri ban sumar ia ki kynja jingthaw baroh, ym ban pynjot ia ki. U la ong ruh ba ka rukom rep jhum ka pynjot pynpra ia ka mariang bad u la kyrpad ia ki paid nongshong shnong ba kin wad noh da kiwei pat ki lad rep jingrep.

Ka kong H Lato, MFS, Divisional Forest Officer, Jaiñtia Hills Wildlife Division,Jowai ka la kyrpad ia ki briew jong ka shnong ba kin iatrei lang bad ka tnad ha kaban iada bad ban pynneh pynsah ia ki mrad khlaw ban kumjuh ruh ia ki jaka sah jong ki. Ka jingdon jong ka Narpuh Wildlife Sanctuary bad ka jingdon jong ki mrad ha katei ka khlaw kan khring ia ki nong jngoh kai pyrthei bad khmatam ia ki riew ieit mrad ban wan jngoh kai ha katei ka thain kaba lah ban kyntiew ia ka ioh ka kot da kumwei pat.

Ha kane ka jingai jinghikai la ïadonlang u Waheh Shnong jong ka shnong Khaddum ryngkat ka jing bad ki kyntien ai khublei la ai da u Ma S Law uba dei u Range Forest Officer da dei peit ia ka Umkiang Wildlife Range.