Hun ka High Level Delegation ka jylla Punjab, angnud ban pynbeit noh syndon ïaka ishu Sweeper Colony

Syllad | The Rising MeghalayaJune 20, 2019

SHILLONG: Ka kynhun na Punjab ba la lamkhmat da u Myntri ka sorkar jong katei ka jylla, u Sukhjinder Singh Randhawa kum u Chairman ka High Level Delegation bad u Jasbir Singh Gill uba dei u MP na Punjab mynta ka sngi ki la iakynduh bad u Myntri ka kam pohïing ka Meghalaya, u James K Sangma bad ki la pynpaw ka jingshaniah ha ka jingtrei ka sorkar jylla ha kaba ia dei bad ki kam ha Them Metor (Sweeper’s colony), Them Iewmawlong ban pynbeit noh syndon ia kane ka ishu.

“Ngi don ka jingshaniah ha ka sorkar Meghalaya bad ki paidbah hangne bad ngi kyrmen bad angnud ba yn lah ban pynbeit noh ia kane ka ishu,” la ong u Jasbir Singh Gill haba kren bad ki lad pathai khubor ha Shillong.

U la ong ba kane ka kynrum kynram ka ju mih man la ka por, hynrei mynta donkam ban pynbeit noh katba lah kloi. “Ngi sngewhun ia kaei ba ka sorkar Meghalaya ka thmu ban leh na ka bynta ki briew jong ngi ha sweeper’s colony,” la ong u MP.

“Ka High Level Committee ka la khmih bniah bha ia kane ka kam, ngi kyrmen ba kan lah ban wanrah noh ia u soh kham kloi. Ka HLC ka pyrkhat na ka bynta ka jingbhalang ia baroh, ngi iohi ba ka sorkar hangne ka shimkhia bad kaei ba ka sorkar ka rai kan tyrwa sha ki briew ba sah ha katei ka jaka,” u la ong.

U Gill u la iathuh ba ha ka jingiakynduh bad ki nongshong shnong ha Them Metor ki la pynpaw ia ka jingbym sngew shngain, hynrei u la ong, “Ki briew hangtei ruh ki shaniah ha ka sorkar jylla.”

“U Myntri hangne u la pynthikna ban ai ka jingiada ia ki Sikh bad baroh ki jaidbynriew ha kane ka jylla, ngi sngewkmen ia kane ka jingkren jong u Home Minister bad kata ka long kaba donkam eh ia ngi,” la ong shuh shuh u Gill.

Ha kane ka jingia kynduh ka kynhun na Punjab ka la aiti ruh ia ka shithi ba la phah na ka liang u Myntri Rangbah ka Punjab, u Amrinder Singh sha u Conrad K Sangma.

Haba iakren bad u James K Sangma hadien ka jingialang u la ong ba ka sorkar na Punjab ka pynpaw ka jingsngew khia ha kaba ia dei bad ka jingshngain jong ki briew jong ki kiba sah ha Shillong bad ha ka jylla baroh kawei.

“Nga la kular ha ki ba ngin shim ia ki lad ki lynti ban pynthikna ka jingshngain ia ki jaidbynriew Sikh,” ong u James.