Hukum u DC East Jaintia Hills iaka NHAI ban maramot mardor iaka jingkieng ha surok NH 6 ha Wahkoh Umkiang

Syllad | The Rising MeghalayaNovember 5, 2024

U Deputy Commissioner ka East Jaintia Hills, ula pynmih iaka jingbthah haka 5 tarik Nawieng ban kyntu ia ki paidbah nongleit nongwan khamtam ia ki kali ba kin long kiba husiar bad ban bud ryntih ia ki jingbthah da ki bor pyniaid kali haba ki iaid lyngba ki jingkieng kiba la tor ha ka surok bah NH-6 hapoh ka district.  

Kane ka jingmaham ka la wan long ruh hadien ba la ioh ia ki jingtip ba ka jingkieng kaba don ha surok bah NH 6 ha Umkiang Wah koh bad kiwei ki jingkieng ha shilynter ka surok bah NH 6 kiba hap hapoh Lumshnong C&RD Block ki la tor bad synjor bad kiba buh jingma shibun ia ki paidbah nongleit nongwan khamam ia ki kali kiba iaid lyngba kine ki jingkieng. 

Kumta khnang ban khmih na ka bynta ka jingshngain jong ki nongleit nongwan bad ki kali kiba iaid lyngba kine ki surok u DC u la bthah ia u Project Director National Highway Authority of India (NHAI), Meghalaya, Shillong ban shim mardor ia ki sienjam ban maramot ia kine ki jingkieng namar ki dei ki lynti iaid ba kongsan bha na ka bynta ka thain baroh kawei.

Kane ka jingbthah kaba la mih u DC ka dei ka sien kaba ar tang hapoh shibnai halor ka jingtor ka jingkieng haka surok bah NH 6.