Hukum u DC East Jaintia Hills ban maramot iaka jingkieng ba julor haka surok bah NH-6

Syllad | The Rising MeghalayaMay 17, 2024

U Deputy Commissioner & Chairman, District Disaster Management Authority (DDMA), East Jaintia Hills District u la hukum ia u Project Director, National Highway Authority of India (NHAI), Meghalaya, Shillong na ka bynta ban phah maramot mardor ia ka bynta jong ka jingkieng kaba la julor ha ka surok bah NH-6 ha ka shnong Pyrtakuna kaba hap hapoh Lumshnong C&RD Block namar ka jingbuh jingma kaba khraw ia ka leit ka wan jong ki kali bad ia ki paidbah kumjuh.

Na ka liang u DC u la pyntip ba ki la ioh ia ka jingtip ba ka jinglong jingman ha katei ka jingkieng ka la sniew shibun ha kaba ki nar rod ki la paw lut shalor bad kaba buh jingma shibun ia ka leit ka wan jong ki kali.

Ha kajuh ka por une u heh ka district u la ai jingmut ruh ia ki kali kiba iaid lyngba kane ka jingkieng ba kin long kiba husiar bad ban bud ryntih ia ki kyndon jong ka Tnat Traffic haba jam lyngba ia katei ka jingkieng khnang ban lait na kino kino ki jingjia ba sngewsih tad haduh ban da pyndep ia ka jingmaramot.