Hukum tohkit ka Sorkar iaka jingtih dewiong beain ha South West Khasi Hills

Syllad | The Rising MeghalayaJune 23, 2024

Ka Sorkar Jylla ka la hukum ban pynlong da ka jingtohkit ha kaba iadei bad ka jingkynnoh tih dewiong beain ha ka thain South West Khasi Hills. 

Kane ka hukum ba la pynmih da u Secretary in-charge Mining & Geology department ka ong, “La bthah ia u Deputy Commissioner, South West Khasi Hills ba un pynlong ia ka jingtohkit halor ka jingkynnoh ba ka la don ka jingtih dewiong beain ha ka thain kaba hap hapoh Nonghyllam Police Station, South West Khasi Hills da uwei u briew uba la tip kyrteng kum u Skindford Nongbri.”

Nalor kata la bthah ruh ia u DC ba un phah ia ka kaiphot kaba bniah hapoh ka 7 sngi khnang ba yn ioh ban phah sha u Justice (Retd) BP Katakey kumba u la bthah.

“Kumjuh u dei ban shim ia ka jingpynshitom kaba tyngeh pyrshah ia une u briew uba donkti hapoh ki kyndon jong ka MMDR Act, 1957, kata lada shem ba kane ka jingkynnoh ka long kaba shisha, ” ong ka hukum.

Shuh shuh ia u Deputy Commissioner yn iarap da u Superintendent of Police (SP) ka South West Khasi Hills District ha kaba iadei bad ka jingpynlong ia ka jingtohkit.