Hikai ka Seinraij LP School Mukhap ya ki khynnah ïaka thong ka Swachh Bharat -Swachh Vidyalaya

Syllad | The Rising MeghalayaMarch 22, 2019

JOWAI: Ka Swachh Bharat Mission toh kawi na ki thong krehkam ka Sorkar India wow wanrah yei khooid i pliah ha waroh ki liang heiwa hei yahkhmat u Prime Minister Narendra  Modi da sdang ya kani ka Mission ha ka 2 tarik u Nai Chiphaw 2014, kamtae nadooh u snem 2014 ter ter hadooh uni u 2019 ka sorkar na ka Ministry of Human Resource & Development iong ka ri India, hajrong ka thong iong kani ka Mission dabooh wei pynmih ko chiboon ki rukom krehkam kiwa yatoh wei khooid i jngiar heiwa ki khynnah skur, ki nongsikai wa ki bor peit bor pynlai iong ki skur  leh em ki ka bynta wa kyrpang u leh neibynta kani ka Mission.

Ha kani ka sngi Mulong 22 u Wisu 2019 ka Seinraij L.P. School, SSA Mukhap chibynta wow pynioo ka dak i yaksoohktilang hajrong ka thong iong kani ka Mission da pynman ko ya ka Awareness Programme hajrong ka mat kyrpang wa ong “Make Swachh Bharat Mission a Reality”.

Ya kani ka prokram da kdar yahkhmat da ki kyntien pdiang burom na u Sharlang Sungoh, Asst. Teacher Seinraij LPS, SSA Mukhap hadien neitae pynbood i purae ya ka Swachh Bharat Pledge hei chimbyntalang da waroh ki khynnah wa ki nongsikai heiyahkhmat ki Students Ambassador.

Ka kong Kheinkor Niang, Head Teacher Seinraij LPS, SSA Mukhap hei chim ya ka bynta wow e i klam i kappe hapyrdi ki khynnah da ong ko kynmoo, i lehkhooid toh iwa emkam lada hei pran samen, ha yung hasem, ha skur wa hapoh ka chnong ka thaw heiwa da kyrsu kyntu ko leh ya ki khynnah wow imsngi ki u pynwyrngia ya i dae hei long i man wa khooid wa pliah.

Ha kani ka prokram dawan ya embyntalang leh da ki bru na ka yung krehkam iong ka District Mission Coordinator, SSA kiwa kynthup iow D. Manner, Jr. Engineer, SSA West Jaintia Hills District wa u S.D.Laloo, Community Mobilizer, SSA West Jaintia Hills District.

Chuh chuh hadien wa da kut ka prokram yaklam ka bynta wa bood kawa ki khynnah skur chirup ki nongsikai ka Seinraij L.P.School SSA, Mukhap chim ki wow leh ha kani ka sngi toh ka Poster Campaign hapoh ka chnong Mukhap kawa man chibynta i e wyrta-chula hapyrdi ki khon ka chnong ka thaw chaphang i emkam iong i leh khooid.