Hato tang namar ba don spah ka lah biang ban Long U Nongïalam?

Syllad | The Rising MeghalayaFebruary 24, 2019

JOWAI: Ha man ki Sengniam, Sengkur, Seng Hima Sima, ki Dorbar shnong, ne wat haka kynhun shipai ruh u don beit u Nongialam u ban ialam iaka kynhun laka long ha kano kano ka bynta kaba ia tyngkhuh. Khlem u nongialam ngim juh poi shaei shaei ruh bad ngim lah leh eiei ruh khlem u nongialam.  Kumta ban lah ban  pyniaid beit iaka kam shakhmat ngi donkam ban jied ia u Nongialam.

Ha baroh kitei ki bynta, ngi donkam ban ioh ia ki nongialam kiba stad bad kiba shemphang ban pyniaid beit ia ka kam. Ki nongialam ki dei ban long ki briew kiba don ka jinglah ym tang ha ka thoh ka tar hynrei ha ka kren ka khana bad ha ka kam kaba iadei bad ki paidbah, ne ki ophis ba iadonbynta lang. Ka jingdon ka kyrdan pule kaba biang ka iarap shibun eh ban long ki nongialam hynrei ka sap kaba shong tynrai ha u ne ka ki long ki bynta ka jingkyrkhu U Blei. Kito kiba la don lypa ia ka kyrdan pule kaba biang ki lah ban hikai da kaba suk ia ki jingdonkam bad ki kyndon kumno ban long ki nongialam. Baroh ki don la ka jong ka jong ka sap bad kam dei eh tang ha ka kam trei paidbah hynrei wat ha la i jong i rympei iing ruh donkam ban don ki nongialam.

U Nongialam udei ban long uba lah ban pyniajan bad pyniadei bad u paidbah (Public Relation) khnang ba yn lah ban pyniaid beit iaka kam ka jam sha khmat.

U nongialam udei ba long pdeng (neutral) khlem da don ka mynsiem niew shilliang khmat ne sngewiapher Niam. Udei ban long uba kloi ban pdiang iakino kino ki jingshah kren ne shah kynthoh namar haba long nongialam kin mih beit ki jingshah kynthoh.

Ban jop ia kano kano ka mat kaba iakhun U Nongialam udei ban long uba tbit  ban ialam iaka kynhun laka long directly ne indirectly . U nongialam u dei ban don ka sap ban pyndonkam iaka buit, ne ka jabieng ban jop iaka issue. U Nongialam u dei ruh ban don ka sap ban kren hakata ka rukom khnang ban lah ban pynhun, pynkohnguh ia ki nongbud bad ruh ban pynsngewthuh iaki ba ia tyngkhuh kam.

Kumta haba ngi jied ia u nongialam ngi dei ban long kiba stad ban jied. Haba ong stad ban jied kam mut ba ngi hap ban pass iaki kyrdan ba heh, hynrei ngi dei ba peit ia u Nongialam u bastad uba shemphang bad u batbit. Ngim dei ban jied ia u briew tang namar ba ngi lah ioh bai sha  na u , ngim dei ban jied ia u briew tang namar ba u Bun Spah Bun Phew, Ngim dei ban jied ia u briew tang namar ba u dei uba ia jan .

Shibun kiei kiei kiba donkam iangi ban bishar bniah bha bin pa bin hashwa ba ngin jied ia u nongialam. Namar lada bakla ban jied ia u nongialam kan don ka jingeh kaba khraw tam hadien ha bud.

Kumta haba ngi jied ia u nongialam ngi dei ban pyrkhat janai bad puson bha ymdei ban shu jied mata madei kat ia uba lap ne kat ia uba kloi ban ai baisha namar ka ban long nongialam kamdei ka kam kaba suk.

Ka 5 snem kadei ka kaba kordor tam haka synshar paidbah. Ban thaw iakino ki ki ain kiba iada ia ka jaitbynriew ngi donkam ia u nongialam uba stad bad u ba shem.

Kaba khadduh tam ka dei ban jied da ki Nongialam kiba lah tbit( experienced) namar kim donkam shuh ban dang hap batai ne hap pan jingiarap na kiwei pat haba ki mut leh eiei. Hynrei ki shu leh hi ia ka ei kaba ki thmu ban leh namar ki lah don lypa ka jingshemphang na lade.

Da U Ma Nangai Sutnga